advertisement

琴日發生左一件對我黎講好得意既事,擺左上Facebook Page 大家開心Share。事緣係呔仔自己入廚房拎左隻匙羹黎飲湯,見到我就好奇問: 媽咪,呢隻係膠定係玻璃黎架?(佢意思係瓷器) 話口未完,佢就放手跌隻更落地,呯冷一聲,爛左!@@ 我果刻覺得,依!咁得意既?原來小朋友係咁試野架? 而當時呔仔個樣話比我知,佢唔知道會爛,所以好驚慌,仲不停話佢可以痴返隻匙羹架,講左好多次。我無怪責佢,教左佢下次想試野時問左大人先,睇下可以用咩方法去試。因為有時D 野爛左會割傷手腳,唔係樣樣野都可以咁樣試。同埋食落肚飲落肚既野就一定唔可以自己試,要問清楚大人!

 

 

呢個PO 其中一個朋友留左一段說話,我好認同!佢話:「如果打爛野即鬧,唔諗小朋友背後原因一律視作搗蛋,慢慢小朋友就變得無左求知慾」。無錯,我覺得小朋友做既每件事,大人都要去分析固中原因同動機,唔可以一做錯就打鬧,要比小朋友解釋返佢點解會咁做,知道個原因,先可以正確同有效地教育佢。
另外,小朋友做錯事時,好多時大人只係講一句「唔得!唔可以!」,但就無講點解。咁樣既話小朋友永遠唔會知道點解係錯,而件事又有幾嚴重,因此下次再犯既機會好高。除左即時制止外,應該即時解釋返件事,咁小朋友就容易D記得同聯想到個利害性。

 

 

而另一樣要考慮既,係小朋友對事物充滿好奇。我地做左幾十年人,所有野都有個模式,經驗令我地知道咩野係錯,但小朋友就白紙一張,正在瘋狂摸索階段。俗語有話,讀萬卷書不如行萬里路!自己親身體驗過,總比聽人講黎得深刻吧!所以我覺得,唔危險既野,不妨比小朋友試多D,咁樣可以令小朋友對所有事物都產生興趣,有求知既意慾。反之,如果大人無耐性教導,不問原因,只懂打鬧,咁小朋友慢慢會變得膽小,驚自己做錯被罰而唔敢嘗試。

 

 

一直有好多朋友話我EQ高,其實我覺得大人只要企返響小朋友角度去睇,嘗試了解下佢地點解會咁做,正常黎講所有野會解釋得到。咁當然,解釋得到唔代表佢對呢件事唔需要負責任,都要睇佢當時既表現。好似呔仔跌匙更後,佢驚恐內疚,仲即刻諗方法去補救,話自己可以痴返隻匙羹,絕對係有承擔既表現,因此我無責罰佢。如果佢唔覺得係一回事,又或者想搵借口甩身,我一定會懲罰。

 

 

其實每個小朋友既性格都唔同,好難一概而論去教導。主要係多D去了解自己小朋友,從而去搵出一套岩自己既教仔方式。我亦試過被呔仔細細激到大喝大鬧,結果喉嚨痛,仲病埋,元氣大傷。自此發現其實鬧得幾勁都無用,係果刻自己發洩左,但對件事全無幫助,三幾日亦固態復萌。最有效既方法,還是大家比心機教,不停loop 住吧!共勉之,哈!(而家知點解個個阿媽都咁長氣!)

 

 

10649638_771640649525608_568790051444624124_n