advertisement

52608690

 

我本身唔係鐘意不停講道理既人,其實我好怕煩。但響教導兩個仔既過程當中,我真係講左唔少道理,每日講,事無大小都講。我開始明白點解D人話父母係仔女既第一個老師,真係講到自己都有D教書 feel。當 blog 友讚佢地懂事,識得體諒別人,善良,我就諗,好可能係因為我教佢地既時候,係用‘講道理’呢個方式,講出件事既前因後果,變左佢地容易明白同了解每一件事既對與錯。無錯呢個教仔方式係好花精神,花時間,仲要夠耐性,但,付出係值得的!

 

大家都知道呃呃氹氹,一定係最快令小朋友安靜聽話既方法。而且父母唔需要用時間花心機去解決小朋友既問題,新玩具,糖果,已經可以令小朋友乖乖服從,所以此舉非常受歡迎。但後患呢?? 以後佢有咩唔順意就扭計發脾氣,要所有人就晒佢,變得自我中心,講野仲大聲過你!做父母縱出黎既,自己受返晒無話可說,但佢始終要入學,要同其他人相處。返到學校成隻小霸王咁,發脾氣欺負同學,唔受歡迎乞人憎,相信無一個父母想自己既小朋友咁樣吧!?

 

某日送仔返學時當日落雨,我仔落車即刻笠住雨衣頂帽,係正常自我保護意識。見到隔離剛落車同學仔唔肯著雨衣,佢爸爸又呃又氹,條友都唔肯著仲尖叫!最後爸爸無符,搵左支棍糖出黎比佢渣住食,即刻無事著衫去!真係一頭霧水,食咩糖呀? 扭計唔聽話反而有糖食?咁仲有皇法既? 你覺得咁係錫佢?其實係害左佢。小朋友收到既訊息就係,只要我發脾氣,唔順大人意,就會得到自己想要既野!好似呢件事咁,大人可以話比小朋友知,落雨如果唔著雨衣,淋濕頭同身之後就會病,病係好辛苦,唔可以食鐘意既野,唔可以玩玩具,去公園等。總之講D係佢鐘意做既野,病左就唔可以做。加上要講佢知佢病左唔係一個人既事,要辛苦爸媽照顧佢,唔夠訓返工做唔到野(下刪幾多字隨意啦) 如趕時間既可以直接講話佢病左之後,一定要去醫生度打支好粗既針先會好返,到時唔喊就得喇。正常黎講一個學齡小朋友已開始識分輕重,佢識同你講數都唔蠢得去邊,無理由咁唔識諗。又如果真係咁硬頸,咪由佢兜頭淋囉,但記得講明返到屋企會罰得好重喎!因為專登整病自己,累及家人,所以要罰。

 

另一例子係去公園玩,建議大家到公園前話比小朋友聽大約可以玩幾耐,等佢地心裡有數。同埋走前要比個時間,例如10分鐘後要走。因為當你突然間話走,多數小朋友都會唔制,無心理準備嘛!但有次見到有個男童,佢媽咪叫極佢都唔肯走,每次都話玩多陣,結果佢媽咪又扮走又剩,最後又係當佢大帝咁話去買玩具先肯走。哇!去公園呢D經常性活動都要買玩具? 咁3幾日就要買一次架喎!可能個媽咪氹走左佢之後都唔一定買玩具(咁仲衰!承諾必須守!),但點解唔可以正常分析比佢聽,帶佢黎公園玩已經係佢既獎勵,媽咪跟住都有好多野要做,佢鐘意玩可以下次再黎,但唔可以唔肯走。又如果真係咁硬頸唔走,咪唔好走囉今次,不過以後唔會再去任何一個公園架喇。要佢明白獎勵只會比做得好既小朋友,唔係比扭計講數既人。

 

104466466

 

 

我地一直既教法係,扭計爆喊係更加唔會得到你想要既野!唔會得逞反而仲會比人罰,所以呔細甚少扭計,因為知道無結果的。唯一係聽話,表現好,先會獎勵。獎罰分明對小朋友成長好重要!佢識唔識分辨是非,都係睇父母係咪獎罰分明。試過呔仔見到有小朋友扭計就可買玩具,佢問點解,我直接答佢,因為我想你係一個好乖好明事理既小朋友,所以我會比心機教你。唔需要同其他人比較,自己做自己覺得岩既事就得架喇。咁你覺得佢咁樣扭計,佢父母仲買玩具比佢,岩唔岩丫? 呔仔話唔岩!咪係囉,如果扭計都有玩具,咁D小朋友仲使咩咁乖呢? 個個變晒壞人,super hero 有排煩喇!呔仔好開心笑了。

 

可能你覺得,我D仔本身乖,所以自動自覺,但我想話比大家知,呢個世界無人一出世就自動自覺,所有人都要學習,D野係我地教佢地,佢地係學返黎。曾經呔仔細細都會拒絕著衫呀,拒絕我認為必要既野。呢個係佢地2,3歲時開始有自我意識,開始建立自主權既行為。捉緊呢D黃金時間去教,要慢慢講道理,唔係要你咩都唔比佢話事,而係要開始灌輸佢,有D咩佢係可以話事(例如著邊件衫,食咩生果等),有D咩係一定要聽爸爸媽媽說話。比佢有限度既選擇,滿足到佢自主權之餘,又訓練到小朋友有一個服從態度。