尋找當日愛的感覺

兩公婆結婚耐左，其實都不一定會失去甜蜜感覺，小秘訣係你如何去不斷翻新一段感情。對象就實係呢個架喇，你要對住呢個人一世又唔想悶，點都要諗D方法去維持。當然每對夫妻所做既都不同啦，聽過有D會臨訓前傾計，一有時間會兩公婆去拍拖旅行等。而我地因為無人幫手湊仔，基本上二人世界係難事，幸運既係，我地都好鐘意自己D仔，所以好享受去邊都拖住兩件既時光。D仔大左，老公又鐘意自己帶佢地去踩板車咁，等我可以響屋企休息。雖然我地兩公婆好少二人世界， 但我地最快樂既係講無聊野，哈哈！成日講埋晒D無聊野我地就會大笑，可能我爛笑啦，通常老公哄我既方法唔係買禮物，而係講笑。

其實兩公婆點樣相處都好，我覺得有互相感激同欣賞既心係最重要！感激對方為家庭付出，縮小自己放大對方，因為當你多D感激同欣賞對方，你就會事事錫住佢，覺得自己真係嫁(娶)得好喇，良性循環，咁就會相親相愛！反之，如果將自己放大，覺得只有自己對屋企付出，唔識感激對方的好，你會漸漸無左歸屬感，對另一半愈來愈淡。呢個時候，其實好需要一個反省，回到原本，究竟當初為咩同佢結婚? 當初愛呢個人，欣賞呢個人既心去左邊? 唔止欣賞，係愛到要嫁(娶)佢返屋企日對夜對喎！無錯，時間係會將好多感覺淡忘，但只要你認真回想一下，不難尋找返當日愛既感覺。大小都好，多做一D甜蜜既事，就能夠維持一段美滿既婚姻。由今日開始，多D 欣賞同感激你既另一半，祝大家都婚姻快樂！