advertisement

1

 

大家有發現呢個年代既小朋友,多左好多唔同類型既精神病嗎? 過度活躍症,多動症,自閉症,專注力不足,閱讀障礙等等精神失調問題。究竟係以前未有將呢D症狀去分類? 定還是而家真係多左小朋友患上呢D病呢?

 

有時我地響公眾場所或者一D小朋友興趣班,會見到患有呢D病既小朋友,佢地行為怪異,唔受控制,好多時會惹來其他家長同小朋友側目,受到歧視,甚至會避開佢地。唔知道佢地有病既人,會覺得佢地百厭無家教,四圍攪呢攪路。但如果用心去睇,唔難發現佢地既行為其實係不自控,係病徵。

 

好似琴日呔仔細細上游水班,有一個新同學加入,原本兩人變成三人。起初我都無留意,之後發現呢個男孩好瘋狂,完全坐唔定,唔聽指令。其間仲拍打細細,每次見到呔細游出去,就衝去拉住佢地隻腳。老師要不停控制佢,浪費好多時間,結果令已經短既課堂(每星期一堂,每堂30分鐘),變得更短。

 

初時我都四圍望,睇下係邊個家長既小朋友咁百厭!但望多一陣,唔係喎,男孩似係控制唔到自己,活響自己世界,病態黎喎!唉,之後我個心都幾唔舒服,慨嘆點解小朋友要受呢D苦呢?!其間老師望到我,只好苦笑。到落堂時,老師同我講呢個男孩唔會留響呢班,會個別教,佢可能怕我唔鐘意阻住進度掛? 但其實大家都為人父母,好明白小朋友有呢D病已經好慘,如果其他人都唔體諒既,日子就更難過。

 

之後見到佢媽咪抱住個妹黎接佢,一齊沖身,男孩又走黎走去企唔定,佢媽咪呢咁hea單手抱阿妹又單手渣花灑幫佢沖。當佢媽咪發現淋濕左我半條褲時,好尷尬同我講唔好意思,我對佢微笑話唔緊要,好小事。沖完身,換衫果陣呔細話我知,頭先果個男孩好拽呀,打人同埋扯腳唔比佢地游,又唔聽老師話!佢地細個唔理解,我解釋比佢聽個男孩病左,佢控制唔到自己,就好似比壞人控制左咁。小朋友有呢種病,唔好話佢地,當佢地正常人咁就OK架喇,咁佢地就會慢慢好返。呔仔細細聽完好似明,問我佢係咪中左毒? 因為佢地睇過SpongeBob卡通,有一套係講成個城市D人食左百厭仔整出黎既蛋糕,結果所有人都變左壞人,好百厭,所以呔細就理解為果個男孩係中左呢D毒。

 

其實呢D事經常都會響我地身邊發生,我地都需要用多D愛去體諒別人,設身處地而想,唔好歧視患病既人,咁患者同佢屋企人就可以生活得更輕鬆更愉快。