愛你變成害你

大家都知道守紀律同服從，對小朋友嚟講係非常重要。而我既紀律同服從性並唔係我媽咪教，而係響學校學返嚟。因為我媽咪從小對我極度縱容，佢錫得我好緊要，我響屋企一直過住非常無紀律，大小姐一般嘅生活。記得細個一話唔舒服就唔使返學架喇，小學成績好好係因為我有小聰明，一上到中學真係要讀書嘅，咪衰晒囉！我媽咪係完全唔會迫我讀書，我讀得夜佢會叫我快D訓覺架，我成績差又唔會鬧，我諗佢係錫我錫到失去理智果種，方向錯左。因為響屋企比人縱大，我個人任性到呢....之後踏入青春期，反叛到爆，真係激到佢生蝦咁跳！哈哈哈！無辦法啦，自己縱出黎自己受返晒。

其實讀大學果時搬左出去住，已經開始過返正常人既生活架喇，因為咩都要自己攪掂丫嘛。而家有左小朋友，不能再任性了，加上有我自己呢個咁大既反面教材，我更加知道小朋友係一定唔可以縱！真係錫佢，就更加要教好佢，做事要有規有矩有責任！我係女仔都仲OK，好彩既話嫁到個好老公，總算有人接手。但我果兩個係仔，咁縱法真係變廢人，害左佢地一世架。幸運地我可以自己一手一腳湊，自己教導呔細。因為小朋友，學好三年，學壞只需要一時三刻，如果佢地比我媽咪湊就大鑊喇......

舉個例子，我媽咪嚟湊孫呢，佢會用湊我果套方法去縱容佢地。呔仔細細有時食飯食得慢，我知我唔在場，佢梗係餵佢地，成5，6歲都餵，仲要追住餵架喎！好喇，我比足時間，亦講左限時食唔晒就唔可以去公園喇。結果食左一個半鐘，無得去啦！我媽咪就會話，帶佢地去啦，唔好咁掃興，仲話佢地而家飽，到肚餓時想食自然會食架啦，又叫我唔使咁緊張等。仲要比我聽到佢教呔細覺得飽，就同媽咪講話飽，再食就會嘔喎！攪到而家兩隻野食半碗就話飽到嘔。OK！飽到嘔，咁咪一直坐到肚餓時再食埋果半碗佢囉！唉，我諗我媽咪唔明咩叫紀律，紀律係要食野嘅時候食野，訓覺嘅時候訓覺。而唔係我鍾意幾時食就幾時食，我唔眼訓就唔使訓......同埋獎罰分明好重要，講左獎就獎，罰就罰，否則以後父母嘅說話都變成廢話了。縱同錫，真係一線之差，用錯方法嘅話，真係愛你變成害你。