advertisement

DSC03171

 

大家都知道而家中港矛盾日漸加深,除左政府處理問題不當令港人非常不滿之外,兩地文化差異亦造成好多磨擦。攪到咁嘅狀況,除左大人辛苦之外,其實小朋友都直接受害。

 

還記得以前讀小學、中學,都有部份同學係大陸新移民,大家都好肯幫助佢地,一齊讀書好開心,佢地亦好快適應香港嘅生活。長大後已變成港女,唔講都無人知佢地唔係香港出世,佢地亦唔會因為自已係大陸人而自卑,全因大家都已當佢地係自己人了,但今日嘅社會環境,香港人同大陸人就未必有當年呢種共融。皆因唔少香港父母,即使響小朋友面前,一提到大陸人都係咬牙切齒的。小朋友聽慣見慣,對大陸人亦潛意識地有種仇恨了。當然每個人經歷或對事物嘅睇法都唔同,相對反應亦唔係旁人可以論對錯。我唔係身處香港,更無資格去評論。只係之前發生一件事,令我對中港矛盾有少少感慨,有感而發。

 

話說上星期同呔細去圖書館,遇到一個講國語嘅大陸爸爸,個女超勁得意喎!梗係撩下佢睇下有無得摸下搣下啦 haha,同個爸爸傾多兩句,佢知我係香港人時,就打趣同我講:「我是大陸人呀,你不會趕我出去吧?」其實我聽到都唔係咁開心,講到我地香港人好野蠻,好似大晒咁。我同佢講,如果我會趕你出去,唔係因為你係大陸人,只會因為你做左壞事。大陸人都有好人,香港人都有壞人,國家大事控制唔到,但個人品行同修養係可以控制。

 

之後呔仔聽到問我,點解個爸爸問我係咪要趕佢走? 我都唔太識答,話比呔仔知係中國同香港嘅國家問題,大家講唔埋欄,所以兩個地方嘅人就唔係咁鍾意對方。但其實咁樣係唔岩,因為我地要決定鍾唔鍾意一個人,唔係睇佢來自咩國家,而係睇對方嘅性格品德,佢係咪一個好人? 佢有無做壞事? 因為每個國家都有好人,同樣亦有壞人。呔細學校都係八國聯軍咁,咩人都有,所以唔可以教佢地歧視任何一人種,只要係好人,都應該同佢地做朋友,對佢地同其他好朋友一樣。

 

希望香港明天會更好,大家可以好似以前咁和諧共處吧!

 

DSC03208