advertisement

有樣野我覺得好得意,就係每個人一生都會不停發生好多個第一次,但原來好多我地既第一次其實並唔屬於我地,而係屬於我地既爸爸媽媽架喎!

我咁講唔知大家明唔明,哈哈!因為我地對好多自己既第一次其實亳無印象,亦無感覺。我地第一次學行,第一次坐塔,第一次自己著衫著鞋,第一次自己刷牙,第一次返學,第一次幼稚園畢業...我自己真係一D印象都無,如果唔係憑住舊照去追憶,根本連幼稚園套校服都記唔清了。可能要直到小學,我地先開始對童年有多返D記憶。但對我地既父母而言,我地既第一次,係佢地最回味最珍貴既回憶啊!而家終於到我回到過去,搵返失去左既感覺喇!哈!因為呔仔細細,我重溫返自己小時候既每個第一次,原來識行識走,讀書識字,常識道理,所有野都係父母無私奉獻,難怪人人都話,做左人父母就會知道要更加愛錫自己既爸媽。

今日,我又經歷左一個興奮既第一次啦!我地呔仔開始換牙呀!佢突然面青青走黎同我講喎,媽咪呀我隻牙好似崩左!我以為佢撞崩左啦,佢話食野唔舒服,我檢查後發現,佢右下門牙鬆左呀原來!我知道後興奮到攬住佢係咁錫,哈哈!我覺得好開心呀,遲D佢愈甩愈多,無牙佬咁笑,講野漏風,我諗起都想笑!哈哈!其實佢地每個第一次都真係令我好興奮架!能夠陪伴自己既小朋友成長,見證佢地每個第一次,真係好幸福好幸運呀!因為呢D成長過程,真係轉眼就過去了,大家要好好珍惜,好好享受呀!

1