- motherhood
- by 呔媽Kelly
- 22/11/2017
上文（從小學習Speak Up(上) 就算未必成功都要爭取！）講到，美國嘅小朋友從小被教育為自己Speak Up，係一件好正確好正面嘅事。除咗可以減少欺凌事件發生，小朋友長大後亦會對不公義之事發聲，令社會更公平更和諧。而香港社會一向風氣習慣多一事不如少一事，其實造成唔少社會問題。
見咸濕佬一定 Speak Up
就好似10年前我返香港做嘢，每日都會搭地鐵，如果你有細心留意，你會發現周不時有咸濕佬專登行到啲女仔好埋，去非禮佢哋。呢啲咸濕佬係有樣睇，而舉動都幾明顯嘅，個車箱明明唔係咁逼，佢就慢慢行埋去貼住啲女仔後面抽水。
我有好多次大聲問啲女仔，你識佢架？之後會問個男人，唔識嘅你做咩貼佢咁埋呀，非禮呀？？此時啲咸濕佬一般心虛啦，話我黐線啦，快步走咗去之類。
我覺得好奇怪啲女仔點解會唔出聲，明明畀人非禮，佢哋真係會話，覺得好驚唔敢出聲。同時除咗我之外，我見到其他人都見到覺得古怪，但又唔會出聲架喎！啲壞人就係蝦你唔敢出聲，佢非禮你都唔敢嗌，又冇人會幫手，你話幾大鑊！
鼓勵呔仔為自己Speak Up
返學幾年，而家兩個仔一個 2 年級一個 3 年級，大仔細個好冇所謂亦怕事，朋友網友都擔心佢返學會畀人蝦，而事實上佢亦有畀人蝦，只係佢唔介意唔上心，我就冇特別教佢要點做。但漸漸大個仔了，我見佢放學有講我知，今日邊個同學對佢唔客氣或騷擾佢，佢會叫同學停手/停口，否則會話畀老師知！
我覺得佢都開始識得保護自己，為自己發聲。小時候嘅佢會覺得冇咩所謂，行開就算，試過我問佢點解同學蝦佢，佢冇告發，佢話驚同學會受罰，我解釋畀佢知，如果你唔話畀老師知，等老師教番好佢，其實你係害咗佢。冇人教好佢的話，佢唔知衰，只會繼續錯落去，第時做壞人。
社會上愈來愈多問題了，學校唔教，或教唔到嘅，責任就落在我哋家長身上。我當然唔贊成大家變成怪獸家長，任何事都去投訴，將責任卸於別人。
相信作為成年人，大家有智慧去判斷是非，當面對不公平之事，我覺得可以鼓勵小朋友正確地為自己發聲，對佢哋日後成長有好大幫助！