- celeb family
- by sue wai
- 05/01/2023
《IT狗》、《野人老師》等電視劇令陳湛文成功入屋，加上《飯戲攻心》「三佬」演出令他人氣急升，工作忙得不可開交。開始廣為大眾認識，育有一歲女兒的他，與我們一起談談新手爸爸育兒經。
陳湛文這天出席產品推廣活動，用「少少辣」的「海帶牛蒡白切肉」形容太太宋雯，他笑指太太性格也有少少辣，自己則從來不吃辣，不過在她的訓練之後稍有所成，可以吃到十小辣。去年底陳湛文與太太求婚四周年紀念，一起到日本旅行，重遊求舊地，與當年旅行所到之處，不同的是現在已成三人行，別有一番滋味。
陳湛文最享受幫囡囡沖涼有原因
陳湛文囡囡 Nina 現時16個月大，識行識走未返學，太太照顧女兒當然辛苦，陳湛文雖然工作忙碌，但是回家也是一名幫到手的神隊友：「沖奶粉、換尿片各有各方法啦，當然係太太比較快手；不過講到沖涼就係我強項，因為囡囡而家16個月大，越嚟越大力，唔使開工嘅時間我都會主動負責幫囡囡沖涼，避免太太同佢鬥力時容易扭親。」
陳湛文開心表示，沖涼時間都算是他最享受的親子時光：「囡囡年紀仲細，出街通常都係坐BB車，乖乖瞓覺。平時一家三口行街，都係自己主力負責照顧BB，等老婆可以專心shopping。」
陳湛文女兒抓周結果有驚喜
太太宋雯是舞台劇演員，因照顧女兒被迫停工，陳湛文希望女兒入學後，太太可以回到舞台，繼續追夢。問他是否希望女兒也喜歡演戲，一家三口成為演藝世家，陳湛文這樣說：「囡囡一歲時，我哋進行咗抓周儀式，放咗好幾樣嘢俾佢揀，當時女女拎起咗《飯戲攻心》劇本集，之後放低，最後攞起一支筆。等到佢大個啲我哋先知道佢有邊方面天份，而家咁睇佢可能鍾意揸筆搵食？未必同我哋一樣喎。」
陳湛文又提到，許多人都會在「抓周」時把錢放在正中間，希望小朋友捉住，一生大富大貴；他當時也放了一個利是封，女兒最後選了一支筆，陳湛文反而覺得非常滿意：「對囡囡冇乜特別期望，不過唔想佢個人咁市儈囉！」
(編按：「抓周」是一種預卜嬰兒前途的習俗，於華人地區及日韓等地都非常流行，按照傳統，當新生兒滿一歲時，父母將各種物品擺放於小孩面前，任其抓取，傳統上常用物品有筆、墨、紙、硯、算盤、錢幣、書籍等。)
