原子鏸三月做新手媽媽：好想BB似老公

九月宣布跟摩洛哥籍丈夫Mehdi El Ajimi「一索得男」的原子鏸（Marsha），預產期將於今年三月，「疫境生B」的她依然保持一貫性格，日前原子鏸更趁大肚留倩影，跟老公一同影孕照。「BB的預產期係3月4日，我的生日係3月7日，唔知道佢會唔會想同我同一日生日呢？」

熱愛運動  老公擔心變放心

原子鏸剛得悉懷孕後只有間中散步，進入 second trimester （孕中期）之後開始做下瑜伽、跳下舞，每日差不多做兩、三小時運動，她說：「本身喜歡做運動，唔想自己會好腫，所以日日都有運動，其實我做完瑜伽之後，發覺佢（BB）喺肚裏都會郁好多，好似喺肚裏面做瑜伽咁。老公開頭見我又做瑜伽又跳舞都有擔心，後尾佢明白我認識自己嘅身體，有信心做自己 handle 到嘅運動，就放心畀我去做。」

媽咪鄭佩佩唔恨抱孫

疫情肆虐，未知陀B的原子鏸可有格外小心？她說：「都會有，去街返屋企第一時間洗手、沖涼。」問到身在美國的媽媽鄭佩佩可有緊張她懷孕？原子鏸說：「媽咪冇特別緊張，不過我哋每日都會電話聯絡，佢喺美國都好少出街，由二家姐照顧佢，我生完之後一定會帶小朋友去美國見佢。我當然想媽媽喺身邊，但冇辦法啦。（媽咪有冇教補身？）媽咪話佢完全唔記得啲嘢。（媽咪有冇幫BB改中文名？）媽咪冇要求，中文名留畀我爹哋去諗，如果唔畀爹哋諗，佢會唔開心。」而英文名她和老公已改好，但暫時不便公佈：「我哋已經幫佢諗咗個名，但想同佢見面之後，先作最後決定。」

她又笑言媽咪一直唔恨抱孫：「媽咪成日同我哋講，生BB好麻煩，人生唔一定要生BB，而我家姐、二家姐都未生BB。所以我陀B爸爸都特別開心，因為佢其實好想有孫仔嘅，BB會係佢第一個孫，所以爸爸心情好興奮。」

原子鏸懷孕至今六個多月，產檢時有冇見過BB的樣子，究竟是似爸爸定似媽媽？原子鏸表示：「有照過，但淨係見到BB個鼻，佢（BB）用手遮住個樣，其實我想佢似老公，男仔嚟想佢Man啲，想佢好似我老公咁鬈頭髮，但老公就話想佢似我會靚啲！」

今次影孕照，原子鏸心情緊張又興奮。「陀BB係一個好特別嘅時刻，搵專人影輯靚相。畢竟懷孕一世人只可以有一次，或者會兩次啦，好值得紀念一下。」仔仔未出世，原子鏸已預告有意生第二胎，似乎好快又會有好消息宣佈呢！

攝影（孕照）：Yours Memory