反起跑線聯盟2｜童星「Billy仔」演技獲讚影帝級！IG吸粉逾1.9萬 徐立德私下是傳統名校生、音樂小天才

近日熱播的《反起跑線聯盟2》，劇中小演員演出獲一致好評。其中，飾演周家怡兒子「Billy仔」徐立德，招牌冬菇頭髮型、天然呆樣，加上角色設定乖巧懂事、天資聰穎，深得觀眾喜愛。《反起跑線聯盟2》其中Billy仔眼泛淚光向媽媽道歉的一幕，我見猶憐，有觀眾直言：「睇一次喊一次」，就連「哎吔媽媽」周家怡都讚他屬「影帝級演技」。在現實生活中，徐立德亦很抵錫，就讀傳統名校的他愛音樂又擅長打鼓，多才多藝，戲裡戲外都是父母心目中的乖仔。

「媽媽」周家怡大讚Billy仔：影帝級演技

日前播出《反起跑線聯盟2》，一向乖巧的Billy仔眼泛淚光，向媽媽道歉：「對唔住媽咪，你係咪有嘢想問我」、「我之前冇講呢，係因為……係因為我唔知點講」，短短數句對白加上喊到抽搐的演技，感動觀眾。

「媽媽」周家怡大讚屬「影帝級演技」 ，她亦透露Billy仔仲會同大人研究劇本，周家怡表示：「上次都要帶住佢哋點演，呢次佢會傾劇本，由演員角度出發問問題，研究前文後理，真係專業嘅演員咁。」劇集播出後，一眾小演員演出自然，備受讚賞，以Billy仔在《反起跑線聯盟2》中的表演最為突出。不少網民紛紛留言大讚這場戲好感人：「呢幕跟住喊，『媽咪永遠都喺你身邊』呢句超攞命」、「Billy 仔喊得好淒涼，肉都赤埋，搞到我都喊埋一份」、「Billy真係好cute，又好戲」。

傳統名校生兼有音樂天份

除了演出獲讚，原來現實中的Billy仔都十分乖巧。拍攝第1季《反起跑線聯盟》時，Billy仔仍是幼稚園學生；來到第2季，轉眼已是小學3年級生。Billy仔N班時入讀聖士提反堂幼稚園幼兒園，其後轉到嘉諾撒聖心幼稚園。現時，Billy仔就讀傳統男校聖若瑟小學，快將升讀小三；早前其爸媽分享了他的校服照，發帖文並寫上：「今日來到P2的最後一日，呢個綠色bow呔都陪咗我兩年，下年升P3就要開始打領呔喇，影返幾幅相留念下先」，紀錄了新里程碑。

人氣急升！IG吸粉逾1.9萬

Billy仔不僅是傳統名校生，亦是個音樂小天才。由於其爸爸、叔叔同為音樂人，因此Billy仔自小已跟著爸爸入band房學打鼓，雖然9歲人仔但鼓藝已相當精湛。自第1季《反起跑線聯盟》播出後，Billy仔已人氣急升，期間接拍多個廣告，如今第2季播出後再度爆紅，其IG粉絲更高達1.9萬，當中亦記錄了生活點滴、打鼓、到studio錄音等，嘗試過很多第一次。