- celeb family
- by sue wai
- 20/07/2017
去年離婚嘅37歲混血靚模Danielle Graham，如今再度活躍於幕前。定居馬來西亞嘅佢，今個月帶埋一對仔女返香港放暑假。Danielle成日做運動keep fit，個樣同身型都keep得好好，不過做咗媽咪，心態就完全唔同晒！
2000年代，20出頭的Danielle是香港炙手可熱的模特兒，當中一系列OLAY廣告最為人熟識。
Danielle 2009年嫁畀馬來西亞銀行才俊，專心相夫教子絕迹幕前，亦練得一手好廚藝，去年離婚之後仲出版烹飪書，將佢嘅心得公諸同好。尋日佢就帶埋細女Sophia齊齊出席TGC舉辦嘅Hello Kitty嵌入式平面爐及廚具發布活動。
鍾意煮餸嘅Danielle平時會同一對仔女齊齊下廚，雖然囡囡得6歲，佢都放心畀小朋友切嘢、埋爐：「我會全程睇實，非常安全，一齊煮餸可以培養親子感情，放心畀佢下廚，可以令佢哋更有自尊同建立自信。」妹妹平時返學要帶飯，Danielle有時會畀佢自己炒飯帶返學校：「炒飯時會加好多粟米、紅蘿蔔、生菜、雞蛋，仲有妹妹最鍾意嘅煙肉！」Danielle仲話8歲哥哥Benjamin已經學識蒸魚：「咁當然我會喺旁邊幫佢手啦。」Danielle亦堅持晚飯要喺屋企食，邊食邊傾，促進親子感情。
現時暑假，Danielle帶埋一對仔女嚟香港玩餐飽，佢哋契媽嘅一對仔女年齡相約，四個小朋友成日約埋一齊周圍玩。Danielle知道香港嘅興趣班五花八門，除咗玩之外，佢仲幫小朋友報咗暑期活動：「仔仔好鍾意砌LEGO，我同佢報名參加建築師工作坊，佢玩得好開心；阿女就鍾意唱歌同藝術，我幫佢報咗陶藝班。」
回復單身之後嘅Danielle，除咗煮餸不時仲會玩瑜伽，做運動，keep住最佳狀態，她亦不諱言現時的狀況是「單身，有追求者」，不過佢強調對象首要條件要接受一對仔女：「It's a package!」。即使結束了一段婚姻，當了媽媽，世界就變得不再一樣。
部份圖片來源：daniellepeitagraham@IG
