小朋友偏食，好可能係因為試都未試過嗰種食物，唐寧就有一個妙法KO兄妹倆嘅偏食習慣

陪住我哋長大嘅唐寧（Leila），已經係一仔一女之母。茹素已 4 年嘅佢崇尚天然簡單生活，日前佢就同我哋分享煮食同埋教仔心得。

作為媽咪嘅 Leila，加上茹素關係，經常會親自下廚。佢更加鼓勵小朋友一齊參與。「叫小朋友食嘢，佢哋成日 say no，其實好多時係因為佢哋未試過嗰種食物，而且唔想嘗試。」

令孩子戒掉偏食習慣
Leila就諗到一個最有效嘅方法，令一對仔女戒掉偏食習慣。「我會叫佢哋參與食物嘅製作過程，好似仔仔唔鍾意食番茄，我就陪佢種車厘茄，自己一手一腳種出嚟嘅成果，仔仔自然肯食，而試過一次就會繼續食喇。」

小朋友當然唔會日日自耕自足咁誇張，平時Leila都會畀一對仔女入廚：「仔仔 6 歲我已經會教佢揸刀，切啲容易切嘅食物，例如蔬菜；而妹妹（2歲）就負責將大棵菜搣成細細棵，有份參與之外又可以鍛練小手肌。」

茹素 4 年嘅 Leila平時飲食清淡，而且好著重環保，為此佢創辦 LeSoap 手工皂品牌，佢送畀小編呢一塊「家事皂」，用椰子油、芥花籽油同埋咖啡豆製成，奶樽、蔬果、碗碟、衣物都洗得，唔怕BB同小朋友食咗化學成份落肚。

今次 Leila 為大家示範一味菜色，是她媽咪家鄉特色的印尼加多加多沙律，更以健康的蒸煮方式製作。製作時用咗近年大熱嘅蒸爐，蒸煮食物唔單止可以保留食物鮮味同營養，連食物顏色都可以keep到，係好健康嘅煮食方法。

加多加多沙律（2 – 3 人份）

材料：
薯仔 半個
甘筍 4 份 1 條
青瓜 半條
番茄 1個
通菜 適量
芽菜 適量
炸豆腐 1 件
雞蛋 2 隻
印尼蝦片 6 – 10 片
加多加多沙律醬 適量 *

*可買現成的印尼加多加多沙律醬，或於印尼食品店購買加多加多沙津磚自行加水稀釋製作。

製法：
雞蛋原隻放入蒸爐，以 85 度蒸 10 分鐘製成溏心蛋
把所有蔬菜及炸好的豆腐切成小件
薯仔、甘筍、青瓜和炸豆腐以 90 度蒸 8 分鐘
時間餘下 5 分鐘時打開蒸爐，加入番茄、通菜及芽菜
蒸好之後加入加多加多沙律醬、伴以印尼蝦片及溏心蛋即可享用

Leila 今次用了蒸的方法煮這道菜，因為平時吃印尼菜多以煎炸為主，多吃有嫌太熱氣；而把食材蒸熟就比用烚的方法更能保存食物的色香味和營養。

Leila 媽咪係印尼華僑，佢話平時會加多加多醬撈飯，由細食到大。

部份圖片：唐寧 Leila Kong facebook