陳子豐專欄#4｜係咪應該生多個呢？

老細岀世已經一年，2019 年感覺上絕對係人生過得最快的一年。照顧初生嬰兒，忙到連瞓嘅時間都冇，而家諗番起都會覺得不可思議。老細三個月大，就開始每日開住332（編按：即係 NOW 新聞台）睇新聞，留意住香港呢個家究竟會變成點。到老細開始學行，就返唔到育嬰園被迫留喺屋企，留意住每日有幾多確診個案。19/20 年過得好快但亦好難過。

呢幾個月被迫留家抗疫期間，我哋一家三口日對夜對，雖然好幸福，但當我忙緊煮飯陳太忙緊覆 email 嘅時候，睇見老細自己玩玩具睇電視，心裡總有點酸溜溜。

「係咪應該生多個呢？」

呢個問題總會喺老細孤獨嘅背影彈岀嚟，但每次我都諗唔到答案。撇除「香港已經變了樣」、「成個地球因為武漢變得好危險」呢啲外在因素，其實要考慮嘅係：兩兄弟/兩兄妹一齊成長係咪會好啲？開心啲？⋯⋯

近日播緊我主持嘅一個親子旅遊節目，我帶住四個小朋友去台灣旅行。喺拍攝嘅過程中，我一直好仔細咁觀察佢哋，希望可以從中搵到我嘅答案。

節目中小朋友會合作做好多任務，所以溝通非常重要。四個小朋友入面其中一對姊妹，年紀相差兩歲，有傾有講，合作無間。家姐好識得照顧妹妹，進行每個任務家姐都會讓妹妹選擇遊戲角色，所以每次佢哋都好少岀現爭拗，玩得好投入。

另一對兄妹，年紀相差五歲。哥哥經常嫌棄妹妹阻頭阻勢拖佢後腿，自顧自玩，基本上冇乜點理過個妹。即使喺鏡頭後嘅媽媽經常提醒哥哥要照顧妹妹，但其實對於呢個只得十歲嘅哥哥，佢作為照顧者嘅責任同壓力都非常之大。

年紀相差得遠，兄妹之間溝通唔到，完全 connect 唔到，相信呢個難題連父母都好難解決。唔通嗌個口號 “we connect” 就 connect 到咩？所以我覺得應該從源頭解決，生完第一個，兩年內追多個，年紀相距少，自然會比較容易 connect 到。

老細十三個月大，細佬/細妹要喺媽媽肚裡懷胎十個月，屈指一算，如果要追到年紀相差兩歲呢個條件，我就只剩一個月時間，而每個月只得幾日造人黄金時間，即係話我得番幾日去考慮「係咪應該生多個呢？」

………
………
………

好明顯，呢個我諗咗成年都諗唔通嘅問題，係唔會忽然間喺幾日內諗得通，除非⋯⋯意外有咗！

而我相信好多細佬妹都係喺呢個情況下岀生嘅⋯⋯

各位爸媽們，你哋又點睇？

Colin Chan 陳子豐
廚藝了得之暖男一名，2019 年正式晉級為一子之父。
演藝表演系畢業，旅遊、休閒節目及真人騷主持《歐遊全細界》、《Se7en》、《的士Go》、《吾係本地菜》、《非常食客》等等，曾演出不少廣告及劇集，包括viuTV劇集《詭探》、《已讀不回》、《PlanB》；香港電台《好想藝術》短劇、《獅子山下》《火速救兵》、《那些年那些歌》等。

IG: @colintszfung / @babybossjared