提到產前抑鬱，原來即使婚姻幸福，都有機會中招！女士懷孕後，生活 180 度轉變，亦面臨許多新挑戰。與此同時，身體的激素變化、壓力、擔心產後對孩子的照顧等，都會無聲無息累積起來。一旦發現產前抑鬱徵兆，必先夫妻同心積極面對，及早尋求專業協助，充分了解自己的情緒狀態，一家人同心合力互相支持，度過情緒低谷，迎接成為父母後的新生活。
沈卓盈陀B後多愁善感 有老公疼錫心情即變好
沈卓盈嫁為人妻後，曾於接受傳媒訪問時，指自己陀B後出現情緒起伏，不過她公開多謝老公超級體貼的照顧。沈卓盈回憶自己自從懷孕後隨時會感到肚餓，隨時隨地想食嘢。試過凌晨五點突然醒來覺得肚餓，老公即刻落街幫她買食物。沈卓盈又自覺懷孕之後容易多愁善感，又因體形發胖而不開心，老公都不厭其煩聽她傾訴，令她瞬即心情變好。
懷孕期間另一半的支持的確相當重要，雖然老公不能幫手生仔，但是一句關心慰問，多多聆聽和支持，已經可以為準媽咪提供最有力的支持。
除了老公支持之外，沈卓盈趁着陀B更向多位靚媽取經，交流湊仔心得，亦以此令自己更加淡定，減低即將成為新手媽咪的壓力和焦慮。
葉翠翠4年抱3壓力大致抑鬱
育有三子的幸福人妻葉翠翠，就曾經於電視節目《日日媽媽聲》當中大談生仔經。葉翠翠於節目中就表示，自己懷孕時也受過抑鬱症困擾，更試過有自殺念頭：「因為密集式 3 年生 3 個，嗰陣好辛苦，懷孕時有產前抑鬱，生完又產後抑鬱，冇耐又有BB，產前抑鬱又嚟喇，去到第3胎，正值屋企搞裝修，喺預產期10日前去咗睇一個單位，跟住唔使24小時就生咗，先係喺屋企穿羊水，之後去醫院，因為醫生做緊手術，等咗6個鐘，好辛苦，生完又要搬屋同湊3個小朋友，抑鬱就爆出嚟，試過有一刻更匿喺廁所喊同有一刻想做傻事，之後同自己講：『個仔大個會唔記得我。』最終想清楚就打消念頭，每日堅持做運動，而家就好正常喇。」
快速測試：是否患上產前抑鬱？
孕婦陀B時容易出現情緒不穩，如果出現以下11個徵兆，就要留意自己是不是患上產前抑鬱症：
- 情緒明顯持續低落
- 易哭
- 失眠
- 對自己的能力失去信心
- 經常擔憂、恐懼、緊張
- 過份憂慮
- 過份自責
- 難於享受生活
- 對未來失去盼望
- 常感到精神不能集中
- 有傷害自己或別人的念頭
（資料來源：仁安醫院）
