Anjaylia回憶生第3胎胎位不正幸有驚無險｜母親節許願：最想小朋友身體健康

Anjaylia母親節有感：多謝我的神隊友

Anjaylia與丈夫黃頌祈（Epaphras）三年抱三，被Anjaylia視為「神隊友」的Epaphras十分照顧家庭，Anjaylia說：「其實我好幸福，有乜嘢事老公真係落手落腳去做，畀足時間我休息，要照顧一大三細嗰個係我老公，哈哈！我先生好努力工作，同時又去照顧我哋，比起上一代，我哋已經好幸福，當然工作同家庭要取得平衡，有時喺屋企工作，因為小朋友喺度嘈，都會忟，不過我成日提醒自己，佢哋真係大得好快，所以我哋好珍惜佢哋搞破壞嘅時光。」

Anjaylia陀B驚魂：胎位不正爭啲要開刀

懷胎十月，母親所經歷有甜，也有苦，原來Anjaylia在懷第三胎女兒Azaliah、臨盆在即的時候，曾遇到胎位不正，要住院近兩星期，當時她憂心胎中的Azaliah，同時惦念着家中的兩位小寶貝，令她一度感到沮喪，她說：「其實頭兩胎陀B時期都好順利，冇嘔、冇抽筋呢啲狀況，到咗第三胎，起初都冇嘢，但係到第八個月時發現有胎位不正嘅情況出現，本身七、八個月嘅時候BB個頭已經向下、係一個適合生產嘅位置，但係到八、九個月嘅時候，BB喺肚入面180度咁轉，個頭轉返上去不特止，成個BB打橫喺個肚度，醫生話有危險，因為一穿水，BB有可能踢到臍帶就會有生危險，如果係咁就需要緊急開刀，所以醫生就見議即刻入院觀察，入到醫院醫生有兩個見議，一係人手轉胎位、一係就等到38週後開刀……」

Anjaylia續說：「正常來講肚入面唔會有咁多位可以轉，加上BB已經6磅幾差不多7磅，但係好神奇，佢可以每日都喺度轉，去到39週，本來都諗過要開刀，不過我最希望都係可以順產，當喺醫院同屋企兩個BB（編按：囡囡）視像時佢哋喺度喊，我哋都好掛住大家，真係好肉赤。」

聽過醫生指示可考慮38週足月後開刀的Anjaylia，到了39週仍希望順產：「去到39週多啲啲，BB終於冇乜再轉嘅時候，醫生就話時機成熟，幫我做咗人手轉頭，之後BB都好乖冇再轉嚟轉去，我就返咗屋企待產，期間都有擔心BB會喺我平趟時有機會轉身，所以我就用枕頭墊住好似坐喺度咁瞓，最後過咗41週，終於如願順產！」

已經有兩胎生B經驗的Anjaylia，沒想過生第三胎竟然有擔心又驚險的經歷，但有了這份經歷之後，她更加珍惜一家人的健康：「母親節最大嘅願望就只係小朋友健康開心，咁已經係最大嘅一份禮物。」