謝安琪 方皓玟組成「期間限定女團」女神與歌姬破天荒合作大談媽媽經

謝安琪（Kay）與方皓玟（Charmaine）都是深得大家喜愛的本地女歌手，二人份屬好友，但少有機會合作。最近謝安琪與方皓玟終於破天荒結盟，並組成「期間限定女團」連開兩場演唱會，勢以歌聲傳達正能量、溫暖疫下苦況；兩人受訪期間亦藉著育兒分享，以行動訴說生命影響生命的偉大力量。

謝安琪 方皓玟相識多年雞啄唔斷

有時候緣分來了，擋也擋不住。兩位炙手可熱的女歌手相識多年、卻苦無合作機會；直至今年8月，她和她終於攜手舉行首個聯乘音樂會，方皓玟形容這是「最好的時機」：「知道有呢個合作覺得好開心，期待已久嘅一件事終於來臨！以前覺得謝安琪好靚，唔係淨係個人靚，個心都好靚；我本身唔係一個說話多嘅人，但係遇上佢就有好多話題，可能因為大家都係媽媽，而且我哋都好鍾意音樂，所以有好多事情可以分享。」

謝安琪也自言是「方謝配」的粉絲：「我都好想睇呢個騷啊！身邊有唔少朋友打嚟訂飛，我個熱線好似無停過；有啲好耐無見嘅朋友、甚至小學同學都好想睇，我都好開心。」

謝安琪自評歌曲貼地有共鳴

從《姿色份子》到《憶年》、《異流》走到《浮沙》，要數經典廣東歌，一定少不了謝安琪和方皓玟；二人亦不諱言將於音樂會上對唱、互唱以及獨唱，務求滿足觀眾願望。至於最令人頭痛的歌單編排，謝安琪卻冇有怕：「我覺得我哋嘅歌都係貼地、親切、容易同觀眾有共鳴，所以設計歌單時好似幾容易，因為好多歌都可以放埋一齊。」方皓玟亦趁機透露二人的開會日常：「通常用一個鐘傾流程，然後用兩個鐘傾日常開心事，哈哈！」

方皓玟感恩兒子出世：感受到生命如何影響生命

除了歌手身份，謝安琪和方皓玟還有一個年中無休的角色──母親！二人不時交流湊仔經。方皓玟說自己昔日個性跳脫，直至兒子出生才變得從容自在，生命從此影響生命：「生咗小朋友之後，成個人好似去咗第二個階段，佢嘅出現令我重新經歷一次人生。」

在 Instagram 查看這則貼文

在 Instagram 查看這則貼文

謝安琪仔女一動一靜：女子安靜聰敏 兒子鑽研父母昔日作品

兩孩之母謝安琪也贊同成長是雙向的：「我兩個小朋友嘅性格好唔同，大仔好外向，同我30歲嘅時候好似，覺得成個世界好有趣、好想衝出去；到我40歲生細女時，因為我嘅人生踏入下一步，所以呢個小朋友同我一齊成長，又會經歷唔同嘅嘢，佢同我好似，都係鍾意安靜、懂得表達自己諗法，所以成長係互動嘅，就算我養育兩個小朋友，都會有兩次不一樣嘅經歷。」

謝安琪兒子張瞻James活潑開朗，由於由細到大讀國際學校，以前少聽廣東歌。不過她發現兒子有了微妙的轉變。「佢近年熱衷聽本地歌曲，更加會主動翻查父母親嘅舊歌細味歌詞，真係令我好感動！」

延伸閱讀 >> 張瞻同你講波經 

問到小朋友的音樂品味是否要從小培養，兩位媽媽異口同聲表示，不會干涉子女的音樂取向，讓他們自由發掘探索，讓每個人都有各自一片音樂的天空。

宏揚母愛：特別版NFT慈善門票 收益捐予「母親的抉擇」

為慶祝「852FES」的誕生，Live Nation HK推出「Awaken Music覺醒音樂」特別版門票慈善NFT套票，收益扣除成本後，將全數捐贈予「母親的抉擇」：

852FES「覺醒音樂 方皓玟 x 謝安琪 Awaken Music Kay Tse x Charmaine Fong」

日期：2022年8月13及14日
時間：晚上8時正
地點： AsiaWorld-Arena