呔媽專欄#242｜等仔女長大先可實現夢想？

一直以來收到網友私訊，會提及自己未做媽咪之前有好多理想，希望仔女長大後，自己仲可以實現得到，同時亦羡慕我湊仔之餘，仲有時間做自己喜歡嘅事，可以有自己事業真係好幸福。呢幾年一路提及自己做手袋，都冇真正點講過呢件事，好吧！就成機幫自己落個廣告，介紹一下自己間手袋online shop - Brandsss (http://www.facebook.com/brandsssbrandsss)

Brandsss 2014年尾開始營業，到依家開咗4年半，主要係賣中價名牌手袋 e.g.Tory Burch, Marc Jacobs、Kate Spade、Rebecca Minkoff等外國牌子。有人會以為係代購店，其實唔係，我係店主亦係買手，負責入貨、影相、度尺、覆客等等，其實都冇話負責啲咩，基本上除咗交收，所有嘢都係我，哈哈！呢件事嘅誕生其實都好突然，係一個香港朋友佢咁啱free緊，part-time讀緊中醫，可以負責香港交收果part，大家一講開就即興發生咗呢件事。

當初老公好反對，可能佢知道我一做嘢就發狂，所以佢有同我講我唔可以掛住做嘢，要平衡到家庭先得。始終佢先係經濟支柱，同埋啲仔當時仲細，唔可以連我都全職做，啲仔邊個理？佢啱嘅，咁我都冇錯喎，結果我係全職湊仔 加全職做手袋，等佢吹我唔漲。我係每日完成所有家務，包括我最討厭嘅煮飯，等佢地眠晒，我先做我嘅工作，好多時做到凌晨2、3點。其實有冇壓力呢?都幾大，除咗長期渴睡，我個壓力係要好似平時咁搞得掂屋企，又湊到仔啦，又唔可以畀老公知我咁夜睡，費事佢又叫我唔好做。

有時係好想佢支持我，但諗下其實佢係肉赤我先咁緊張，冇叫停已經好好，我都明白。好多網友都話全職湊仔好辛苦，我諗我全職湊兩個加埋手袋生意，都真係疲累。而有咩令我咁堅持，唔放棄呢件事呢？好簡單，係一個滿足感。湊仔唔係唔好，我好鍾意全日對住佢地，陪住成長，我覺得係種責任，選擇有小朋友，就係需要付出時間同心機。另一方面，我唔想我嘅世界只得湊仔同家務，日日咁樣loop我會癲，但我冇得揀，所以無論幾累，我都想響工作上搵番原來嘅自己，輪迴完一堆家務，我想做番自己喜愛嘅事去總結每一日。可能我冇講，我係果啲上晒床熄晒燈，但諗起有個客未覆，我都會開番燈搞掂埋佢，先睡得安樂嘅人，你話我點可以湊足10年仔，咩都唔做呢，工作對我嚟講好重要。

另一個好大嘅滿足感，當然係做落咗，開始多熟客，開始收到客人讚賞嘅說話，話我地Brandsss手袋又平又靚，好多款出面搵唔到，好鍾意。每句客人嘅讚美我都感激，因為每個手袋都係自己覺得個款靚，品質好先會入貨。做buyer其實都算係我讀Apparel Design果瓣，都係用自己眼光去揀靚嘢，得到認同，我當然非常開心！加上自己做事宗旨，誠信好重要，我一定要我啲客買得開心、放心，所以我地有after service，售後有咩問題我會盡力幫客人解決。

將心比己，雖然千零蚊二千零蚊一個手袋唔係好貴，但你都會想有問題時，可以有個人問下，幫下手。可能係做生意嘅誠信同埋工作態度，客人對我地有種信任，好似朋友咁，好多時買開嘢都會傾兩句，我好珍惜網上商店，都可以好似開舖頭咁同客人吹水傾偈，哈哈！呢啲大概就係我做手袋最大嘅支持同滿足感了。