近月楊洛婷仔仔Tristan於照片中經常帶著頭盔，成為不少人討論對象。到底楊洛婷兒子戴頭盔所為何事？早前她告訴小編，兒子戴頭盔並非因為佻皮怕他撞親頭，而是另有原因。她更笑言兒子戴頭盔任務已完成，日前更開心影了「畢業相」，到底Tristan點解又要威又要戴頭盔？不如等媽咪楊洛婷揭曉啦。
楊洛婷兒子頭部左邊越來越扁 苦無對策
原來楊洛婷仔仔現時一歲兩個月，剛剛完成頭盔矯形療程。她回想兒子出世後，經常「瞓埋一邊」，今他的左邊頭仔越來越扁。「囡囡Tanya小時候都有類似情況，鍾意瞓埋一邊。我於是趁佢瞓著幫佢將頭擰番另一邊，佢都會聽話。但係細佬Tristan性格與Tanya完全不同，每次幫佢轉頭，都會大聲呼叫，對於瞓另一邊非常反感。」
眼見仔仔左邊頭越來越扁，楊洛婷用盡方法幫他改善。「我試過好多唔同方法，例如購買BB專用枕頭、啫喱狀矯形枕頭，又有聽老人家講用按摩『搓頭』方法嘗試幫佢改善頭形，但幫助唔大。如果女仔個頭扁埋一邊，大個之後都可以用髮型掩飾，但係男仔大部份都係短頭髮，個頭唔對稱就會好覺眼。」
楊洛婷擔心兒子頭形扁影響外觀與健康
除了外形問題，楊洛婷更擔心頭形扁塌會影響兒子健康：「我其實最怕頭形問題會影響佢健康，擔心有可能壓住神經線或者有耳水不平衡等情況，最怕呢個情況會變得嚴重，影響佢成世人嘅健康，到時就後悔莫及。」一切疑慮於今年初遇到解決方法：「剛剛農曆新年時家庭聚會上，我遇上堂弟，佢話我知仔仔都有扁頭嘅情況，於是搵咗矯形師幫手，經過療程之後頭形大大改善，頭形可以回復對稱。」
楊洛婷於是去矯形中心為Tristan進行免費諮詢，治療中心建議她讓兒子用矯形頭盔改善頭形，但療程動輒要五位數字費用，令她心大心細。「扁頭問題治療黃金期係四個月至八個月，腦囪生埋之後，頭形就難以改善。當時仔仔已經七個月大，同老公商量之後覺得呢個方法可以一試，於是就幫佢訂造頭盔。」矯形中心花了1小時為仔仔做了詳細的評估，大約兩星期頭盔就於美國運到香港。
楊洛婷仔仔頭盔戴足23小時 1個月即見明顯改善
起初楊洛婷仔仔每天帶頭盔幾小時，習慣之後，更將時間增加至23小時。「除咗沖涼之外幾乎全日都帶住頭盔，好在頭盔非常之輕，佢一啲感覺都冇，仔仔並冇唔習慣。」除了改善頭形，頭盔更意外發揮保護作用，楊洛婷大女Tanya經常要抱弟弟，但行為非常粗魯，有時會無意間令仔仔頭仔撞落地下，幸好有頭盔保護才避免受傷。
起初楊洛婷每兩星期帶仔仔去矯形中心複診，治療師會檢查仔仔頭部生長情況，再將頭盔帶到一個特別房間，進行處理。楊洛婷估計治療師將頭盔作進一步打磨，增加空間讓頭形繼續生長。
早前網相討論區瘋傳一段尋找頭盔啟示，有媽咪不小心將嬰兒的矯形頭盔遺留在的士內，更焦急盼望好心人幫忙尋找頭盔。原來頭盔不單止作價數萬元，而且是度身訂造，即使重造一個亦要等幾星期，可能會錯過最佳治療時機，難怪那位媽咪如此緊張。
楊洛婷會將一片BB專用清潔棉放在頭盔內，讓頭盔保持清潔和吸汗。由於長期帶着頭盔，仔仔頭頂部份出現脫髮情況，不過楊洛婷並不擔心，現在正式除下頭盔，她相信兒子頭髮好快會重新長出來。
5個月療程完成任務 楊洛婷評效果理想
頭盔帶了一個月已經見到明顯效果，令楊洛婷有信心繼續療程。合共複診五、六次之後，至今仔仔頭形雖然算完美，已經變得平均對稱，經歷五個月，最近頭形生長進度理想，療程已經完成。楊洛婷自評兒子的頭形已大致對稱，她對效果也非常滿意，亦慶幸兒子至今沒有因為頭形扁塌引致健康和自信問題。
