加拿大移民專欄(5)【為母則強 – 其實我只想一個女人仔陪小朋友去加拿大讀書，可以嗎？】

其實如果你一心只係想嚟加拿大陪小朋友來讀書，煮下飯、執下屋，基本上係冇問題的，唯一係，你嘅身份只會一直都維持住喺一個「遊客」；而作為「遊客」，只可以做「遊客」應該做的事情：睇吓風景，買下餸，玩下手指，碌下手機，風花雪月，甚至「談情說愛」都可以吖，但係就唔可以返工、亦唔可以返學。

另外，一般憑eTA入境嘅「遊客」只可以逗留六個月，如果你好彩遇上一個好嘅官員，佢係有可能會簽你同小朋友學簽一樣有效期嘅「旅遊記錄」(visitor record) 畀你， 你亦可以嘗試申請續期 (extension)，但「有機會」≠ 一定要畀你㗎，不是「應份」的，這個要明白，萬一唔得你要研究如何安頓小朋友㗎。

如果你入境時同官員講你settle好小朋友之後就會走：要做的啊，誠信很重要呢！

另外，小朋友自己嚟讀書當然自己要有一張學簽喇，而學費就自然係畀海外留學生嘅費用，亦要留意唔係間間學校會收海外留學生，亦可能有限額或一定限制。

咁嘅安排好處係邊？就係你鍾意喺邊一個城市落戶都得，唔受移民條件限制。因為講到尾，你只係一個「遊客」，想喺加拿大邊度「旅行」都冇問題㗎！（當然小朋友要返佢張學簽上面寫嘅學校，不過呢個可以改，不是大問題。）但只要你做足現時要隔離3+ 11（or 14天）嘅本分，同埋喺簽證到期之前離開就理論上冇乜大問題～

【按： 疫情下一名家長可跟學童入境，可見此連結。】

稅務安排方面，呢個情況唔可以一概而論──重申：移民上嘅身份同稅務上嘅身份係兩回事！

「畢業成材」之後，小朋友有可能可以用畢業簽證留在加拿大工作，但係（至少暫時係）唔會自動變成公民身份啊～ 又，即使佢自己攞到身份，一般都未能夠即刻申請番阿媽老豆做加拿大人啊！

【謎之音：實情好多阿媽未完成呢個project之前已經投降留低小朋友自己返香港：小朋友大喇嘛！佢哋會話……】

唔知你小朋友年紀幾多啦，但係你自己計番成盤數，覺得負擔得起，而個outcome又OK，唔覺得會係「得個桔」嘅，可以做吖，唔駛理人哋講咩㗎！ 有花生友「嘚」你浪費時間、小心失婚、咁唔識諗嘅話，你咪話我有嘅係錢，可以任性囉～ ［笑］ 不過楊媽媽自問就真係冇大家咁叻：適當嘅時間都想做番個女人仔；例如剪草、掉垃圾、殺蟲呢啲粗重嘢，都係留番畀男人做好啲喇！

本文作者：楊媽媽

人稱楊媽媽，兩孩之母，she.com元祖級會員。小學畢業後移民加拿大，落地生根。著作有《隨時入籍．寶寶愛移加》（2019），與香港人分享移民加拿大實用資訊。

>> 加拿大移民專欄所有文章

fb @ 隨時入籍。寶寶愛移加
MeWe @ 楊媽媽陪你移民加拿大