呔媽專欄#271｜網上上堂初體驗

因為新冠肺炎疫情日趨嚴重，美國呢邊 3 月中開始停課，暫時停至 5 月頭，能否復課就要睇到時疫情如何。所謂停課不停學，除咗停課頭幾日，老師派予每個學生一份大約三個星期嘅課程功課外，近日知道三星期後不能復課，紛紛開始 set up Online Lessons，老師及同學們用 Zoom App 去教學。對於美國嘅老師嚟講，其實呢個時刻都幾困難，除咗預備教學，仲多咗好多網上軟件要學用。

雖然美國係大國，科技發展又好似好先進咁，但老實講我哋移民嚟美國咁耐（已經係居於繁忙大城市），真係覺得美國嘅科技好落後。你諗下香港有八達通，日本有Suica Icoca卡已經幾耐！呢邊係近年先有類似呢啲方便市民嘅科技，但外國人都係唔會用，而家仲係數緊銀仔搭巴士地鐵。通常與時並進嘅都係年輕人，老一輩嘅人唔好話用視像軟件，平時連 WhatsApp 都唔會用，外國人多數仲用緊 text message 同 email。

兩個仔學校嘅老師們比較傳統，都用咗好多時間去安排 Zoom 視像課程，終於呢幾日開始可以同同學仔一齊視像。由於大家同學都有2星期冇見面，於第一次視像時表現緊張又興奮！而老師亦安排第一次視像係傾心事，先照顧好同學們嘅情緒。問下啲同學仔停課後心情如何？有咩開心事／唔開心事？有冇唔習慣？大家響屋企做啲咩？做功課時唔明又會點樣解決等等。隱約聽到阿仔啲同學逐個舉手講，有人話平時好少見父母，而家可以多啲 family time 好開心！有人話好悶，好想返學。又有人話好嘅係可以睡晏啲，但唔好嘅係冇得出街，冇得做出 sports等等，我覺得大家咁樣傾偈，老師又可以了解同學仔心情，然後加以安慰，好窩心呀！

除咗用 Zoom 開 Live 講課，老師們亦 set up Google Classrooms，於設定時間畀同學們問功課難題。同時又怕同學仔停課時期，響屋企要打發時間，又再預備網上習作，圖書館之類supportive tools。呢個狀況，其實幾感動，作為老師，疫症下要照顧屋企家人，又要顧住學校工作，準備教材等班學生可以跟住課程繼續學習，希望佢哋順利升班。大仔嚟緊 6 月仲要係小學畢業，8月升初中。雖然暫時未知道教育局點樣安排，期待已久嘅畢業典禮應該都要被迫取消，但人生就係會遇到好多未知，好多困難！最緊要係大家一齊拖住手去克服佢，老師同學共渡時艱。願同學們繼續努力學習，唔好辜負老師一番心機。

呔媽 facebook page: 騎呢.weak7.卜車呔