學習接受不完美

早排我因為呔仔二年級第一日返學，收左黃牌而緊張過2日，果個Facebook Po各位網友所講既無論支持、安慰、還是意見，通通都令我有好大得著！其中一個好多人都有提及既係，我地都只係平凡人，平凡人就會係有好多不完美既地方，不完美好平常，唔需要比咁大壓力自己。

我用心嗒左陣佢地呢D說話，其實係真喎！一直以來呔仔比我既感覺太好了，係我接受唔到佢有行差踏錯既時候，所以一時之間失落得好緊要。但其實，大家都係平凡人，無論係大人或者細路，都有做錯事既時候。我需要學習接受呔仔細細既不完美，而同樣，我自己作為媽媽角色，都經常有不完美既時候吧！

好似有網友舉左個例子，佢有個親友因為一直做任何事都好成功，到而家低潮時情緒會變得好低落，佢正學習緊面對生命中既不完美。聽完佢呢件事，我突然間明白到，原來所有野都太完美既時候，只要稍有差池，就會好介意，亦會影響成個人既情緒，就如我呢件事一樣。然而負面情緒唔止影響到我，同時呔仔見到媽咪咁緊張，佢亦會有負面的壓力。諗深一層，就算老師有負評，又有咩大不了呢? 返學係學習成長，小朋友們都有好大好大既進步空間，有錯漏係好正常既事。人生就係不斷從錯誤中學習，先可以達到成功既一日！

諗到呢度，個人真係放開左，又輕鬆左好多。有時D野自己一個人好容易鑽牛角尖，樂觀如我，都有困惑既時候。其實好多野只要朋友們開解指點一下，已經可以將成件事扭轉，身心重新出發！做父母呢條路唔易行，有問題既時候唔好自己一個唔開心，多D同朋友傾訴，其實過左望返轉頭，只係小事一樁，話唔定仲係一件值得經歷既事添！放鬆心情面對。各位父母加油呀！