放縱與疼惜 一線之差

記得初初寫Shemom時，其中有一篇文章係講我自己，自知非常心急，忍唔住小朋友會慢手慢腳呀，拖拖拉拉阻時間之類既事，會忍唔住快快手手幫佢地搞左佢。但咁樣其實對小朋友唔好，會阻礙左佢地學習自理同養懶佢地，我當時諗，要好好改善心急性格。兩年間，我發現其實我唔係好做得到，人地話江山易改，本性難移，係真！當時有提及過，縱仔同錫仔，其實只係一線之差。縱，你係幫佢手做晒佢要做既野，而錫，係你用心教佢點做，等佢自己去做，有機會學習自立，長大後面對唔同既事情可以更堅強。

近排我老公開始經常出聲，叫停我，要比兩個仔自己去攪，我就發現，有好多位我無控制自己既心急。可能兩年前佢地細個D，我幫手做野唔係咁顯眼，而家7，8歲仔，真係大個仔了，D野我出手做就好覺眼，係時候好好面對呢個問題了！

其實好多野佢地都係自己做，我地對佢地都有一定要求。我覺得啦，佢地自理能力完全無問題，特別是細細，佢本性好獨立，好多野都鐘意自己打理返。係呔仔會比教依賴我，而且佢係特別慢手慢腳，所以佢既野我會成日出手，實在係太睇唔過眼！於是老公落左order，特別是呔仔，要嚴格訓練佢，同埋專登比多D 野佢負責，增加返個責任感。

之前佢講我都唔覺，之後發現，這些湊仔年來，我已經變成本能反應地一聽到要求就會即刻做，真係幾有問題。例如出街食飯，老公叫呔仔拎杯水比佢，我就好自然會即刻拎左，老公叫停，係叫呔仔拎唔係叫我，我先醒覺。又或者同呔仔行街佢會一直痴實我，老公又會要佢自己去睇佢鐘意既野，因為佢太習慣我響佢身邊跟出跟入，唔太獨立，所以又要訓練。有時自己會睇唔到自己問題，當局者迷丫嘛，好彩身邊的人可以互相提醒！希望黎緊對呔仔細細既訓練可以令佢地成長，而我自己都有一個戒掉心急既轉變吧！