新學年的磨合

又開學了！美國呢邊大部份學校，8月中開始就陸續開學,呔仔細細都唔例外，已經返左幾日學喇~ 呔仔升小二，細細升小一，等我簡介下佢地一向返學情>>其實同大家想像一樣，真係輕鬆得好緊要。

之前都有寫過，hea又唔代表佢地學唔到野喎，相反，過去學校生活，佢地響輕鬆無壓既教學方式之中，各方面都學到好多野。但老實講，有D位真係連我教仔態度咁放寬，都忍唔住問呔仔一年級時個老師，佢咁咁咁喎！無問題咩? 究竟得唔得架?? 當時佢老師既答案係，無問題喎，仲答左句 “Kids are kids!” 佢咁講我咁聽啦，加上自己教開佢地，其實OK既，所以無特別迫佢地要改D咩~

好喇！黎到呔仔升小二第一日，放學開開心心搵新老師影相，埋黎第一句就 “Tyler got a yellow card today!” 真係心臟病呀，第一日返得果4個鐘學，可以比人罰黃牌！果個驚嘛程度係10級，平時自己個仔不嬲攪事既，就話預左，第一日就咁樣，真係接受唔到… 好啦用左一晚時間去平伏下，據了解後，原來係佢keep住遊魂，老師叫佢10幾次都好似聽唔到咁，非常唔專心，所以拎左 yellow card。跟住老師仲問起呔仔飲食習慣,佢話太多糖份,會影響小朋友專注力, 叫呔仔戒糖份同吸收多D蛋白質,對學習有幫助。知道問題後，其實都放心左既，起碼唔係攪事或者唔聽話。一開學發夢我OK既，話晒返香港玩足兩個月，返黎一星期就開學，都要D時間進入狀態，然後返多兩日學，呔仔已經開始重返地球了，希望佢黎緊繼續專心D上堂吧！

諗返，其實都關係每個老師對學生有唔同要求，點都要時間去磨合,了解老師要求。之前呔仔既班主任太放鬆喇！變左今年呢個老師，相比之下一定係嚴格好多,但睇得出非常錫班小朋友，呔仔入佢果班就岩晒，係時候比老師提點下！而我做媽媽的,更應該放手配合老師,先可以改善到小朋友問題。朋友提醒,老師教同自己教真係唔同, 身份唔同，自己幾嚴都會錫住,大個仔喇,出去撞下板,比老師教下係好事! 絕對同意既,希望呔仔黎緊呢一年會有明顯改進啦! 在此都祝各家長同學生:開學大吉!遇到一班好老師!!