當奶奶愛錫仔仔，佢嘅想法都會同我一樣，好想一家人和睦相處，好想對方對仔仔 / 老公好啲。

好多人都覺得婆媳關係好難處理，我就比較平常心，因為呢個係日常生活一部份，避無可避，亦都唔到我唔理，以下呢幾樣嘢，我就堅持做足。

基本禮貌
日常打招呼、過節打電話問候，呢啲我一定做足；至於打電話約食飯，我會留畀老公自己打，始終自己個仔打嚟梗係開心啲，而我要老公約奶奶，係避免佢有「新抱下下管住我個仔」嘅錯覺，我一定唔會咁做。

表現殷勤
俗語有話「無事獻殷勤」我就唔係咁睇，我覺得殷勤都係基本禮貌嘅一種，好似奶奶明知我煮飯一般，次次去到佢屋企，我都會主動幫手。奶奶唔使我幫手係一件事，我繞埋雙手等食飯又係另一回事，多口問句，喺奶奶心目中又會無形加分，何樂而不為？

奉陪到底
去奶奶屋企食飯，食完飯當然要主動幫手洗碗，呢件事我一定做，因為一星期去得老爺奶奶屋企一次，洗個碗真係好容易，呢個時間亦可以畀奶奶足住老公傾偈。

到洗完碗，我哋通常坐喺度一齊hea、一齊睇下電視咁，一定唔可以畀奶奶覺得我哋食完個飯就趕住走。我同老公通常會坐到 11 點幾先走，反正無下場，坐多一陣，晏啲返到屋企直接上床瞓覺。

節日送禮
所有大時大節，特別係中式節日，我都堅持會送禮畀老爺奶奶。講真平時佢哋拜神嗰啲嘢我已經唔多參與，過時過節點都要表示下。

有朋友覺得我做嘅嘢係虛偽、好假，不過我絕對唔同意。尊重奶奶，係要由心而發，因為女人係好敏感，丁點作狀都好容易識穿。

而當奶奶愛錫仔仔，佢嘅想法都會同我一樣，好想一家人和睦相處，好想對方對仔仔 / 老公好啲。

其實最核心嘅就係自己同老公嘅關係，呢方面就要靠自己造化了。