英國置業Jason Ou (10)【英國搖控買樓3個小技巧免做水魚】

愈來愈多香港人隔山買牛投資英國房地產，根據 Aston 數據顯示，2020 年香港買家一舉成為全英國第二大海外買家，在倫敦的總投資總額達到 £305.6m，成三億英鎊，買咗全英國超過 6,000 間屋，數字實在驚人！

我相信這當中有一部份投資者屬於非理性購買，甚至未嚟過英國就網上買樓。我明白好多人都一樣嘅想在英國置業，但又冇辦法親身到英國來，以下就畀三個小技巧，等你哋可以減低做水魚嘅機會。

勿睇小細平台

Rightmove、Zoopla同埋 Onthemarket係目前英網上三大搵樓平台，雖然Rightmove係最多人用，你以為實冇衰？我就建議大家起碼同時都睇埋 Zoopla。行內人都知道，物業公司如果用Rightmove 平台賣樓盤的話，每個月的月費大概係 £1200-£1600。對比Zoopla就平好多，每個月只係大概 £300-£500。因為呢個條件，有好多小型中介想慳錢而唔用Rightmove，而選擇Zoopla或者Onthemarket放盤。我有個朋友最近就係從Zoopla平台搵到間筍盤，呢種盤在Rightmove反為少見，大家千祈咪走雞﹗

表面標價水份高低

到你睇中咗地段及單位款式，但間間屋條件不一樣，標價又不一樣，點樣可以快速知道售賣中嘅物業定價是否符合市場？有人會試着下去一些估價網站，然後輸入樓盤地址去估價。但可以同大家講，呢個方法非常唔準確，因為這些網站的估價可以因為好多因素而被抬高。最好的方法，還是查看這物業附近地段，屋型及面積類似的單位最近成交價，這才是個更好的方法。英國樓不似香港，唔會幾個月升幾十%咁誇張，所以睇番其他單位交易價，才比較實際。

善用Lettings Agent

喺香港，買樓及出租樓宇可以係同一個Agent，由他一手包辦。但英國Estate Agent 分工就比較細微，會分為買樓部、出租部、行政部和樓宇管理部等等。值得一提係英國唔係每一間中介都會做賣樓，有一部份中介只會做物業出租及物業管理，也就是單純的Lettings Agent。如果大家留心一下在Rightmove平台上輸入地區後選擇「Find Agent」，該地區所有中介公司都會被一一羅列出來，當中就會有唔少係只做物業出租管理的Lettings Agent。大家可以試諗一下，如果你從中介公司A睇到個盤想出價買來投資出租，但係唔肯定層樓價錢抵唔抵，或者地區好唔好，樓是公司A放的，他們的說法你當然會有所懷疑。呢個時候你就可以直接去搵Lettings Agent中介公司B，講話你想買呢層樓攞嚟放租，問佢值唔值得買，如果買咗之後就用佢哋嚟做出租管理。因為冇conflict of interest，Lettings Agent B一定會同你講老實話，甚至會會話埋畀你知當地邊區買來收租最好。

本文作者Jason Ou

大學主修經濟，移居英國22年，任職房地產投資行業超過十年，現為英國 Global 32 物業公司創辦人。

昔日文章：英國置業Jason Ou

fb@Global32UKproperty