【親子好去處】小朋友放電必去！室外室內遊樂場、趣味探知館～免費入場｜沙田好去處

【親子好去處】沙田作為人口多達60萬人的市鎮，區內滿佈遊樂設施，由室外到室內遊樂場，由收費到免費都有，加上沙田區有多個商場，近年更有不少知名食店進駐，啱晒小朋友玩完去行街食返餐飽！

沙田親子好去處1. 史諾比開心世界

位於沙田的「 史諾比開心世界」，係以史諾比漫畫為主題的遊樂場，成個遊樂場範圍不大，但就有多個史諾比漫畫的場景可以影相，有得玩又有打卡位，仲要係免費入場的，玩完就可以返入商場行街，附近仲有唔少食肆超方便，絕對係沙田好去處放電首選！

史諾比開心世界最受歡迎一定係獨木舟，小朋友可以坐獨木舟順著水流慢慢前進，沿途可以欣賞到史諾比各種探險的可愛場景。小朋友需要自己坐一個位，家長可以坐後座，船上需扣上安全帶。但因為是免費的，等候人數會好多，要有心理準備會等好耐，當日我哋一去到就叫爸爸去排隊，小朋友就邊玩邊等。

場內仲有「棒球主題遊戲場」，細心睇成個遊樂設施都有好可愛的棒球裝飾，仲有多款滑梯選擇，當中一條勁高的旋轉滑梯望落好似好高，但原來唔係好刺激的，小朋友瀡落嚟時唔會太快，哥哥玩完一次又一次，好開心。

史諾比開心世界開咗好多年，經歷過日曬雨淋，所以部分場景都比較舊，但因為角色們都好可愛，值得去玩下！

史諾比開心世界Snoopy's World

地點：新界沙田區新城市廣場購物中心一期3樓平台

開放時間：早上十一時至晚上七時

沙田親子好去處2. 香港文化博物館

唔想去室外挑戰高温下的户外活動，不如去參觀博物館喇～小朋友可以從展覽中學習，重點係有冷氣涼下，絶對係夏天的好去處！我哋今次去咗沙田的「香港文化博物館」，佢係喺沙田市中心內，交通都好方便，容易去到。

博物館最吸引的一定係「兒童探知館」，展館分為8個學習遊戲區，當中Aidan最愛係「米埔沼澤」區探索，「深入地底」可以認識生活在地底下的小動物，另外仲有小型的魚缸欣賞，又可以認識本地考古學家的工作，認識香港神秘的出土文物。

「農村生活」展館，哥哥可以扮下小村民，體驗下在農村生活的景象。

仲有一個圖書角，入面的圖書選擇都幾多，喜歡睇書的小朋友就啱哂。

展館仲設有「香江童玩」展覽，展出香港設計的懷舊玩具，哥哥對某些古董玩具好感興趣，但好可惜而家無左試玩區，無得俾小朋友玩下舊時的玩具。

但因為疫情關係，以往最受歡迎的觸碰式互動展品和電腦遊戲都暫停開放，無左好多可以玩的地方，所以小朋友都有小小失望，家長可以考慮吓等之後重新開放遊戲時再去玩都未遲。

全館的展覽廳都可以免費入場，另外，博物館內的餐廳裝修緊，要到6月尾先重開，所以大家要食咗飯先好去參觀呀。

香港文化博物館

地址: 香港新界沙田文林路一號。

交通 :乘搭港鐵至車公廟站（A出口）再步行5分。

沙田站（A 出口）再步行約 15 分鐘。

資料來源： 安妮媽媽親子日記