【新抱唔易做 – 002】奶奶對兩個仔偏心偏到出面

我老公有一個大佬，大佢兩年，平時以我觀察，奶奶係錫大仔多過我老公……好多嘅。好似大佬 13 年結婚，佢就送咗好多首飾畀大嫂，但係過兩年到我哋結婚呢，就真係乜都冇。當然全家人都冇人敢觸碰呢件事。

直至有一日，成家人食飯時老爺竟然問起佢啲金銀珠寶去晒邊，佢就話畀晒大佬，咁老爺仲要問多句：「咁細佬有冇份」，當時我心入面已經講晒粗口，奶奶竟然話，唉以為佢娶唔到老婆架喇點知咁快結婚啫……

我哋當堂呆咗，場面勁尷尬……而最尷係要仲要扮晒冇嘢繼續食完呢一餐食飯，到呢一刻為止，如果要數我呢一世人食過最長嘅一餐飯，呢餐飯一定榜上有名。

到最近我發現奶奶成日同大哥佢哋一家去睇樓，原來奶奶想幫大哥大嫂佢哋上車。我知道咗梗係問老公有冇咁嘅事，佢就話唔係好清楚，咁唔係好清楚即係都知知哋啦，我又問佢點解我哋冇份？

咁老公就轉述奶奶嘅說法，話我同老公都係大學畢業而且未有細路，兩個人儲錢好快可以畀得起首期……（下冊二萬七千字），咁其實講到尾真係偏心偏到出面啦。

純粹呻下不喜勿插。