- hot topics
- by sue wai
- 15/06/2021
大台電視劇《寶寶大過天》昨日首播，這套由岑麗香、馬國明主演的新手父母主題電視劇，相信會繼 2018 年《BB來了》之後，成為新手父母熱烈討論的話題劇集。除了兩位主角之外，飾演女兒「童童」的小童星梁芯語（Libby）亦旋即被起底。原來她年紀輕輕已經演出經驗豐富，當年《BB來了》亦有份飾演「允豬」一角。如今她更擔正做主角，認真犀利！
梁芯語能夠脫穎而出擔正「童童」一角絕非偶然，《寶寶大過天》監製廖晉碩便在大台官方雜誌訪問中大讚芯語演技出眾：「劇中有不少喊戲，聽到嗌 cut便會收聲，十分叻女！」
當年做過「允豬」的小童星又豈止梁芯語一個？《BB來了》劇集入面亮相過嘅允豬更加不只6個！就連一手發掘允豬，帶允豬試鏡拍攝嘅專業星探，泓星影藝公司負責人 Eric 自己都一度數錯咗！不如趁《寶寶大過天》開播，一齊回顧下「允豬的誕生」啦！
《BB來了》是否由6個BB飾演允豬？佢哋當時幾歲？
《BB來了》係大約半年前拍攝，當時電視台要求我搵一堆BB，我最終搵咗大約70個BB畀佢哋揀，之後揀咗20個BB進行面試，最後揀出6個BB作為演員。揀6個BB係因為配合劇情發展，要用上唔同大細嘅BB，而因為BB需要休息，所以要揀多幾個方便BB輪班出場。
Eric珍藏嘅「七大允豬」圖集：1. 陳映墁（1個月）、2. 謝涴柔（半歲）、3. 陳妃頤 （5個月）、4. 李迦嵐（8個月）、5. 梁芯語（11個月）、6. 吳忞玥（11個月），仲有7. 鄧巧媛 （1歲1個月），括弧係佢哋半年前參加拍攝時喺相入面嘅年齡。
其實允豬唔只6個，仲有一個頭幾集出場嘅初生BB，係後來補上（上圖一號BB）。另外大家可能都記得允豬畀奶奶迫食蜜糖嘅一幕，呢個「特別版允豬」相信大家都印象深刻。
被迫食蜜糖嘅BB允豬黃聖雅，拍攝時只有三個月大。
作為專業星探，為何因為《BB來了》感到崩潰？
其實我一直都係專門負責搵特約演員，搵BB做戲對我嚟講唔係高難度，但由於劇集入面有三位導演、7-8個PA（助理編導），佢哋都知道小演員難控制，睇相又同見真人好大分別，於是個個都要求見過小演員真人、精心挑選過先決定邊啲集數用邊個演員進行拍攝。即係不斷安排6個小演員畀十幾個人揀，依家諗起個過程真係崩潰（苦笑）！
電視台昨日舉行宣傳活動，其中四個「允豬」再度出場，事隔半年，小演員們已經長大了很多。
咁多允豬一齊出現，小編諗起《超人特工隊2》入面BB積積嘅分身術！
係咪所有允豬都係女仔？
所有允豬都係女仔，不過有一個小演員係「男扮女」，佢其實係我自己個仔（！）如果你記得劇情中段講到大佬（徐榮飾）送前妻入醫院生BB嗰幕，前妻最後生咗個囡囡，嗰個BB就係我嘅仔仔。因為當時正直流感高鋒期，政府都宣佈停課，當時都真係好難搵到BB做呢個角色。因為全部演員都已經喺度，冇咗BB就拍唔成，安排補拍亦十分麻煩，於是我就先斬後奏，喺屋企「偷」咗自己個仔出嚟，事後仲畀老婆鬧咗一大餐...
大佬送前妻入院呢一幕。
呢個BB其實係Eric自己嘅初生仔仔。
仲有出咗幾秒大頭。
一個稱職嘅「允豬」有咩條件？
其實BB都係電視台方面挑選，當然外型上有要求，要可愛得意同埋切合角色年齡。咁細嘅小演員當然冇演技可言，但就要肯跟人，唔易喊，如果怕生保一抱起就喊，咁幾可愛都冇用啦。
做「允豬」有冇人工？
允豬當然有人工，不過只係象徵式車馬費。小演員係以日薪計算，一返工就要全日standby，所以先要咁多個允豬替換，因為BB好需要休息，唔好以勉強佢哋日日返電視台開工。其實小演員喺電視亮相只係滿足佢哋表演欲，感受下群體生活。想賺錢就要做電影演員，廣告演員人工就更高。
BB轉眼就大，大家認唔認得呢班允豬豬？
圖片：被訪者提供及TVB截圖
