【新抱唔易做 – 001】奶奶想 add 我 facebook，我應該點做？

我同老爺奶奶唔係同住，關係都OK，但係最近有一件事急於處理，令我十分煩惱。

事緣前幾日約咗老爺奶奶飲茶，由於要找尋共同話題，講到「食」就人人都啱傾啦，於是我就半吹噓話自己喺朋友之間出晒名鍾意周圍去食好嘢，又會推介畀其他朋友。跟住佢就無啦啦話，不如add佢facebook，有咩好嘢食share埋畀佢知。

估唔到平時好少認叻嘅我，一衝出嚟認叻就出事……其實add佢facebook我真係好有所謂，事關我平時都唔係成日發放負能量，份人都好正氣冇嘢怕畀人知嗰隻，但係真唔想連唯一可以呻下嘅空間都冇埋……但係佢已經send咗request畀我，唔可以扮睇唔到，到底應該點做？

直到呢一刻我諗到四個應對方法：

【1. 扮睇唔到佢add我】扮唔知，唔add佢做friend，但係呢個只係權宜之計，下次見到佢佢又再問，到時支支吾吾又係唔知點答。

【2. 同佢講自己好少玩facebook】同奶奶講呢排公司好忙，老細畀好大壓力，所以自己都唔多玩facebook，平時貼開嗰啲飲飲食食相都冇再貼喇，等佢知難而退。

【3. 畀佢add】畀佢add我做friend，放棄我最後一片自由空氣嘅土地，唉。

【4. 畀佢add，但唔畀佢睇我啲post】畀佢add冇所謂，但唔可以畀佢100%知道晒我諗乜+我嘅行縱，所以add完佢我會即刻block佢，當然做下樣有10%嘅post係會畀佢睇到。

1. 同埋 2. 根本係唔可行，簡直係攞我自己同奶奶嘅關係做賭注，佢老人家一定唔高興；但如果揀3. 或者 4. 我亦都唔好受，而且 3. 只係權宜之計，紙包唔住火，除非佢真係唔鍾意上網（據我所知唔係），如果唔係佢就會好快發現我其實block佢，唔畀佢睇我的 po，所以唯一嘅選擇都係4. 只准佢睇我部份嘅post，但係次次出 po之前都要問自己，呢條po畀唔畀奶奶睇到好呢？諗起都煩，我諗我漸漸、慢慢，會真心嫌煩唔再玩facebook。

暫時唯有係咁，如果有其他更好嘅plan，記得通知我。