呔媽專欄#244｜體諒另一半，由對調角色開始

擁有一段美滿嘅婚姻絕對唔容易，因為婚姻關係唔係一個人嘅事，係雙打賽。即使自己肯蝕底，無限付出，只要對方回敬唔一致，某時某刻，婚姻關係都會破滅。所謂冰封三呎，非一日之寒！好多時我哋對對方嘅不滿，唔表達唔討論，以為忍咗佢就冇事，積埋一大堆不滿，好易變咗計時炸彈，一觸即爆。在我嚟講，有問題一定要即時解決，拍拖相處時，已經會考慮第時同呢個人結婚會係點。如果一開始拍拖已是大家互相忍受，好多不滿，其實呢個並唔會係一個適合自己嘅結婚對象。當然，兩個在不同環境成長嘅人，性格觀點一定有偏差，但如果磨合咗一段時間，相方仍然不能遷就，唔好期望婚後可以改善，因家庭責任更大，問題只會更多。

一個家庭，能夠和諧相處係好重要！如何和諧，好睇夫妻二人性格，其中一方性格太強硬，說話太倔，甚至個人冇幽默感，都係好難相處融洽。其實關埋門就真係一家唔知一家事，但朋友聚會中，有時都會見到好多尷尬場面。例如老公們對老婆態度差；有時老婆們又完全唔識畀面老公，好鍾意響朋友面前奚落佢；大家講緊笑，又唔知邊個突然認真咗，對號入座，搞到有人黑面離場都試過。同時我發現，呢啲事情唔係一兩次發生，兩公婆相處可以長期對決咁，一句唔啱聽就黑面，但又無論黑幾多次面，另一方仍然係會繼續一句質埋嚟。究竟係習慣咗，懶得去改變？定係根本唔知問題所在？要傾訴唔一定搵朋友，兩公婆平時都可以傾訴心事，將自己唔鍾意嘅野講晒出嚟，畀對方知道自己感受，亦可改善關係。

講幾個例子畀你哋聽，可能大家聽完又會有所得着。話說早排身體差咗，醫生吩咐多休息，鐵人生涯要稍停。我親愛嘅老公開始幫手煮飯洗衫，分擔家務，我十分感動啦！然後我發現呢個角色調換，原來對婚姻關係好重要！因為只有親身經歷過，你先明白當中感受，難處，會更體諒對方，唔會再一句質埋去，點解你唔咁樣咁樣...

例子一，我洗衫一向係出街衫褲同內衣褲分開洗。而老公嘅返工衫褲同襪再分自己一機洗，因為佢返工服比較污糟。有次佢見到我將佢嘅返工衫褲同襪一齊洗，佢有啲不滿，叫我要分開埋衫褲一機，襪一機，咁會乾淨啲。而我近排見到佢幫手洗衫時，佢都係將返工嘢全部一機洗晒。人就係咁得意，你一句說話批評別人嘅工夫係好閒，到你自己落手落腳嘅時候就自打嘴巴了。相信佢以後都唔會再同我講，返工衫褲同襪要分開洗啦，哈哈！

例子二，晚晚煮果餐晚飯，係我最討厭嘅事。自從煮飯交畀佢，佢終於感受到我嘅苦況喇！煮咗半年，近排忍唔住講，要晚晚咁樣煮，真係好厭惡！我聽到呢句我好感動，因為佢終於明白我晚晚要煮飯嘅感受！從前我煮好飯，佢響出面玩緊木，叫極唔入嚟食！有時又會我煮煮下，佢話出去同朋友食。而家佢一煮完，見我哋仲未執檯，佢已經黑面，風水輪流轉吧！慘呢⋯⋯

以前有時我煮完一碟有肉有菜，覺得累了唔想再煮，佢望到會問一句：就係一碟？唔煮埋其他畀啲仔食多啲？結果我又入去快快手煮埋。今晚我聽到佢話累，炒一碟西芹雞柳算了，我話冇問題，都夠啦，叫佢唞唞。你明唔明個分別？因為我煮過，而佢開口話我果時佢未煮過，我唔怪佢。
其實婚姻要美滿、要和諧，真係靠雙方願意付出，願意體諒。好似我講嘅例子，唔係要話老公不是，而係想提醒大家，夫妻關係中，一定要識得體諒另一半。明白對方日常要工作要照顧屋企已經好忙好辛苦，唔應該隨口苛刻，仲要工夫唔係自己做，係對方做嘅時候，真係多謝都嚟唔切，無論做成點都應該多多讚許！平時說話語氣，懂得照顧對方感受，只要真心愛錫對方，婚姻關係自然美滿。