夏天必訪關西的理由

hot topics
by 呔媽Kelly
22/05/2016

近日又開始Plan暑假一家人去日本關西旅行。關西大阪黎緊會係第三次去，朋友都奇怪，點解唔去下另一D地方? 其實去第三次的我們，仲有好多野未玩過！

如果問我日本邊度岩親子，一定係大阪遠勝東京。東京比我既感覺繁忙，亦無大阪咁多岩小朋友玩既地方。推介的話，大阪市內我會首選“Kids Plaza Osaka”，其次就係「神戶市立王子動物園」，遠D可以去埋白濱溫泉區既“Adventure World”,非常好玩！

【Kids Plaza Osaka】

呢個地方係大阪市區，搭幾個地鐵就到。裡面除左有一座大型遊樂城堡比小朋友放電之外，亦有多個分區比小朋友唔同學習體驗，全部都係開放比小朋友玩架！岩晒鐘意神奇事物，坐唔定鐘意攪攪震既細路，哈哈！包括科學原理，昆虫區，外國傳統學習，地鐵禮儀，職業扮演，幼兒遊樂區，日本茶葉製成學習等，非常豐富。相信當地學校應該會帶學生黎呢度Fieldtrip，絕對係好好既體驗！

【神戶市立王子動物園】

我地上年去過呢個動物園，覺得幾好玩，都好多動物睇，講得出都有。另外最特別既，係有個小區比大人小朋友坐入去摸兔仔，我兩個仔好少機會摸動物，所以佢地好開心！另外我好鐘意睇大腥腥，佢除左有媽媽腥腥狂食野之外，仲有BB腥腥非常活躍，好得意好攪笑！同埋入場唔貴，鐘意睇動物可以plan呢度。另外神戶市仲有另一朋友推介的動物王國，佢話個場係動物四圍走，唔算多，但可以摸同餵佢地，我都諗住去睇下，今次試下去唔同地方。

【白濱 Adventure World】

呢個係一半機動遊戲，一半動物園既主題公園。上年連去兩日，如去一日一定要早去，因為好多野睇同玩，都幾大型，入場費會貴少少，都值的。佢除左有齊一般動物，例如北極熊，海豚等外，又有個摸動物小區，都幾得意，好岩小朋友玩。企鵝們仲會定時出黎遊行，同觀眾合照。而我最鐘意係佢有個Safari野生動物區，好大！草食動物，例如長頸鹿等，可以徒步去睇。而獅子黑熊等肉食動物，就要坐觀覽車或自己租車入去。好好睇，好近，大開眼界！每當有車經過，職員會餵佢地食肉，比遊客近D睇佢地，好細心！