【寵妻是如何練成的？】柏原太賀

年輕的新婚女性朋友，跟老公仍甜甜蜜蜜，本來應該無憂無慮。可是，她前陣子發現身邊不少結婚幾年的朋友，跟老公總是為分擔家務或照顧子女日嘈夜吵，難免也會擔心將來。
然而，最近她卻豁然開朗。
好奇一問，原來她近日因工作關係，認識了幾位寵妻的熟男。於是，便問他們到底一眾太座大人，有何獨門秘訣令他們如此貼服呢？
聽完朋友分享後，真的啼笑皆非。

原來，三位熟男朋友都有一個共通點，竟就是家有懶妻！
明明三人工作已經忙到無日無夜，但無論家務或教仔女做功課，家中懶妻不只通通懶理，不時提醒（指派）老公仍有未完任務外，還怨埋老公們疏忽，或者做得慢。
朋友呆了，問：「吓？點忍呀？」

寵妻老公們齊聲嘆氣後，便一起苦笑。
最初，他們當然也會抱怨，面對無理及不公平的家事分配，也曾跟老婆們爭拗過。然而，無論爭吵有多激烈，老婆們也都故態復萌。
於是，他們都會相約出來訴苦。雖然他們明白再呻也無補於事，但也總好過屈在心底，便慢慢形成了定期約會的苦主聯盟。誰知其中一次，當中一位成員刻意裝晦氣地大講反話，即場反過來指罵另外兩人，竟三人都笑不攏嘴。
對的！就是最簡單的方法，改變不了老婆，就改變自己心態。

三人更即場示範，先由一位抱怨幾句開始，接著......
「你呻夠未？你老婆連仔都幫你生埋！女人係冒生命危險幫你生仔，而家兩母子都平平安安，你係要感恩！忙得少少，唔好以為可以同你老婆搵命搏去比較！」
「咁我平日咁忙，佢都有眼見，日日淨係買衫化妝！」
「佢化妝買衫，咪又係益你！你知唔知而家勁多女人會有外遇㗎，你又唔係有錢，又唔係靚仔過人，你老婆同你一齊，已經係捱住，你仲好意思講！」
另一盟友加入戰圈。
「無錯啦！你估你老婆當初跟你果時，一定要同你一齊？佢無得選擇咩？大把靚女都可以跟個又大肚腩，又無頭髮嘅，貪你咩呀？又唔係有錢過人，有錢，你就唔駛做啦！」
「跟得你，即係佢都放棄咗嫁有錢人！你都未補償佢，憑咩埋怨！」
「你應該鼓勵佢，越懶越好，咁你先有存在價值，明唔明？」
「咁我都有得選擇啫，但佢咁難頂，我連出軌都無啦！」
兩負責指罵的盟友異口同聲：
「你講咩呀！唔出軌，係應份㗎！」

然而，角色對調。原本負責指罵的變成埋怨，而本來抱怨的，就反過來指罵埋怨者。
三人，一round後，齊齊開懷起來。
朋友嘆為觀止。

由互呻變成互砌大會後，三人在家反而任由，甚至鼓勵妻子懶惰起來。只要每星期，三人互訴老婆如何懶得出神入化，他們又怎樣寵得過份的事蹟時，當成趣事分享，從此便再沒在家裡爭吵過。

朋友明白了。
寵妻的男人才不自虐，反而能樂在其中。
但關鍵卻是，老公身邊的朋友，都是專一的男人。

上一篇 >> 婚前分後

重溫 >> 柏原太賀其他文章