結咗婚兩年幾，有樣嘢我都幾堅持。由於我唔係同老爺奶奶住，守住屋企嘅門匙係尤其重要。
其實奶奶唔只一次提到想要我哋屋企鎖匙：「詩，你返工咁忙，冇時間執屋，等我有時間上嚟你哋度幫下你手啦，好閒啫。」背後就係想配一條我哋屋企嘅鎖匙，雖然佢講出嚟係善意，但係我真係唔想，始終要堅持守住自己嘅私隱同空間。
上個星期中秋節，又係去奶奶屋企食飯，老公忽然有講起我前幾日因為唔記得帶鎖匙，喺街度遊蕩咗三個鐘等佢收工開門先返到屋企。奶奶梗係又話：「唉！早叫你哋配條匙畀我啦。」
我照樣扮聽唔到。皆因一條門匙，攞起手好似好輕，其實背後意義十分沉重，絕對不容有失。
