網絡熱話｜港男年薪近百萬呻「怕生仔無錢養好辛苦」網民反對：咁搵2萬蚊嗰啲點算？

生仔除了要考牌，更大的考量更是「養唔養得起」，以前有指「養一個小朋友最少一百萬」，但隨著物價越來越貴，小朋友越多越多興趣班要上，養小朋友的費用實在難以想像，生仔前都要想清楚自己是否足以負擔。

男性平台討論家庭問題，一向場面冷清是意料中事，但日前有港男在LIHKG以「家庭月入8萬打算生小朋友會唔會好辛苦」為題發文，指自己有自住樓，單位亦有一間房間給小朋友，但卻擔心即使月入8萬，打算生小朋友「會唔會好辛苦」。問題一出，眾多網友積極留言討論，盡揭香港中產男士辛酸。另外有人看完言論後更感慨「跪求帖主有錢都唔好生」，指「如果你都話辛苦，搵得兩萬嗰D點樣樣算」？

港男真心問「月入8萬打算生小朋友會唔會好辛苦」網友集思廣益

這位港男於LIHKG發文指自己「月入8萬打算生小朋友會唔會好辛苦」，並透露自己已經有自住樓，已預留一個房間給小朋友，由於怕辛苦而向廣大網民詢問意見，結果引過十分激烈的討論。而在一眾意見中，主要分為兩大派，一派主張「要慳錢先養得起」，而另一派則主張「樓主真係有錢都唔好生」，意見兩極。

網友普遍認為過份憂慮：月入8萬都好意思話辛苦？

有網民看到樓主8萬月薪收，指出樓主「根本無資格話辛苦」，認為「8萬都要慳？就算扣供埋樓同生活開支、保費，之後都剩3-4萬啦，儲埋錢交稅都夠晒養仔，反正有細路之後旅行都去少咗，又少咗啲開支」、「兩公婆搵到8萬，呢D問題都講得出，自己唔識計數唔識諗，樓主真係有錢都唔好生仔」、「如果8萬都要慳，咁搵2萬嗰D人點算？租緊樓嗰D咪死得」、「咁中位數以下嘅人係咪要絕育」、「你好意思話辛苦，有樓已經係人生勝利組，其實係咪你根本唔想生，搵藉口」、「生仔除咗錢，時間同心機都好重要，如果你第一時間係諗錢，建議唔好生仔」、「你真係有錢都唔好生呀唔該，大把人3萬幾蚊都生2件，人哋咪又係咁養，Steven都養到啦，睇你要咩啫」。

過來人真心剖析「要慳錢先養得起」

不過，另外又有過來人指「月入得8萬真係要三思，要好慳，另外真的不要比較其他家長，好累」　、「而家好多興趣班要報，又要私校國際學校，使費好大，生活水平一定下降」、「當供樓$30,000，兩公婆搭車、返工食飯、電話費、買少少衫褲每人都$6,000，有小朋友仲要請工人姐姐$6,000，計完已經無咩錢淨，仲有管理費、水電煤、差餉呢」、「我月入少你DD，自己湊無請工人，想佢讀國際學校都要左諗右諗，一定要慳錢」、「睇你想點養，慳有慳嘅養，但大個就有機會怨你點解唔畀多D資源佢」。

樓主召喚大量「中產爸爸」揭香港生B養仔開支大

不過亦有網民指自己家庭月入5萬，住三房一廳，聘請了工人姐姐，已生2名小朋友，每年可去一次旅行。樓主即產生極大好奇心，指「5萬都可以咁洗錢？Full Pay樓定係有多餘錢Support？」，對方則指「層樓係父幹，其他支出都係自己」。

另一位身為過來人的網民亦發言，指出月入8萬雖然表面風光，但列出明細支出之後，就會發現支出項目之多已足夠將8萬大元燒盡，直指：「覺得8萬蚊夠養成頭家真係好膚淺」，而眼見眾多網民指「8萬蚊夠使有餘」，即指「呢班人一定係無生仔」，更列出一清單數算「學費、補習班、工人、車、供樓、平時生活開支、奶粉、水電煤、食物、保險、子女成長基金⋯⋯呢D講緊一個B，8萬蚊最多只啱啱好，你以為D錢好好用咩」、「真係好膚淺，8萬蚊夠養晒成頭家？爸媽家用唔使比 (畀)？」

爸爸圍爐結論：生咗仔有冇錢都一樣辛苦

樓主與大部份網友作為男生，可能比較著重金錢部署方面，不過亦有網友指出「無論月入幾多，有小朋友都係好辛苦，無關係。」，所謂「辛苦」，未必是在金錢上，而是要令自己與另一半接受一種「凡事不再只以自己為先」的生活方式才是重點；另一網友更自爆比樓主更富裕：「都辛苦，家庭月入12萬，養緊一個2歲」；「對，其實錢都次要，心機同精神先最攞命」。

一時之間LIHKG頓時化身Daddy Kingdom，場面壯觀！要生仔，似乎心理質素、充份心理準備比起百萬年薪更加重要呢。Daddy們，加油啦。