大阪行：奈良餵鹿

又黎大阪行﹐因為去左十幾日﹐真係玩左好多岩小朋友既親子活動。有D更精彩既﹐不過剛剛返到美國轉緊時差﹐暈暈地﹐不如寫個中左伏既﹐等大家下次去大阪時可以慳返唔使加入行程﹐哈哈~

大家去大阪既話﹐一定會plan埋「奈良餵鹿」呢個行程。因為奈良離大阪唔遠﹐搭JR都係個零鐘﹐加上香港好少有得睇鹿﹐所以呢個行程大部份人都會去﹐包括我地。不過當日細細唔舒服﹐出門唔夠一陣仲嘔﹐結果我同細細返左屋企抖﹐老公同呔仔與同行朋友就照去。夜晚返到黎﹐老公話把鬼﹐我同細細無去都無損失。

點解呢? 原來話果度除左餵鹿﹐無其他野玩﹐係一個大公園。而最重要既係D鹿勁惡﹐會咬人撞人。大人去還好﹐如果小朋友既就危險D。見你買緊野食預備餵佢﹐佢已經想衝埋黎。當你手執食物﹐佢地開始圍埋黎﹐老公係咁比佢地撞。雖然D鹿無角﹐但咁撞法都好痛下﹗而呔仔唔使講啦﹐見到D既情況已經嚇到甩轆﹐要爸爸抱﹐又猛扯住爸爸「快D走呀﹗走啦爸爸~」唔好話慢慢享受﹐大人細路都想快D走人~

但除此次外﹐其實奈良公園景色唔錯既﹐唔係一心去餵鹿既話﹐都可以去果邊行下食下小食。我見老公影D相返黎﹐園亭樓角﹐好似11月紅葉同櫻花季節果時都會好靚﹗係餵鹿果part有點令人失望。

雖然大家幻想中既「親親大自然。奈良餵鹿之旅」破滅左﹐哈哈~ 不過唔緊要﹐下篇我會介紹返一個勁開心既親親大自然好去處﹐大家keep track on Shemom啦~ ^^

奈良公園之景~

原來一早提示大家D鹿係好危險既~

呔與爸爸餵鹿﹐呔仔比鹿圍即閃﹐哈哈~

好味醬油燒糯米~