advertisement
咁多年嚟，多啦A夢每年都準時喺大銀幕同大家見面，今年又點會例外！今個暑假，多啦A夢、大雄、靜香、胖虎同小夫將會帶你穿梭時空，返去遠古時代見證日本嘅誕生，仲有一班好得意嘅小神獸陪你周圍闖蕩添！《多啦A夢：新‧大雄之日本誕生》已經係系列中嘅第36部劇場版動畫，係1989年作品《大雄的日本誕生》嘅重製版本。呢部作品當年創下420 萬嘅觀看人次紀錄，直至舊年先被《多啦A夢》另一系列作品《STAND BY ME多啦A夢3D》打破，可想而知呢部作品係幾咁受歡迎！動畫早前率先喺日本上映，反應叫好叫座，輕鬆奪取連續3個周末票房冠軍，並創下2D多啦A夢電影票房最高紀錄，累積票房目前已突破40 億日圓！
《新‧大雄之日本誕生》由八鍬新之介兼任導演同編劇，佢之前擔任過《新‧大雄的大魔境》嘅導演，亦喺長期參與製作《多啦A夢》電視動畫嘅幕後功臣之一，唔知今次又會有咩驚喜畀到一眾大小粉絲呢？動畫將以「日本人嘅起源」為主題，喺人類文明進化嘅歷史背景下，透過一場穿越時空嘅大冒險嚟描繪大雄與朋友之間嘅友情同成長。各位大小朋友，今個暑假記得約埋親朋戚友一齊準時登上時光機喇！
為救朋友，穿越時空，決戰不死精靈王！
由於現實生活太多不如意事，大雄同朋友決定嚟一次史上最大規模嘅離家出走。喺多啦A夢嘅幫助之下，佢哋乘搭時光機嚟到7萬年前嘅日本，打算喺呢片原始國土發揮小宇宙，建立夢想家園。恰巧一個來自遠古時代嘅光明族少年高高路，因為時空錯亂嚟到現代日本。多啦A夢佢哋得知高高路嘅族人被黑暗族侵略，決定帶佢穿越時空，並聯同時光巡邏隊，一齊對付妄圖改變歷史嘅黑暗族首領──不死精靈王吉加桑比﹗
上映日期：2016年8月4日
語言：粵語配音
導演：八鍬新之介
片長：104分鐘
片種：動畫
