一家大細6月去左大阪2個星期，今次選擇入住AirBnb民宿，因為比上次住Cross Hotel平一半價錢，而且住2個星期的話，有洗衣機方便好多，唔使半夜手洗衫褲。今次就試試其中一間評價唔錯既民宿，地點好正！近心齋，都幾滿意。同大家分享下住Bnb一D要留意既事^^
話說我地入屋時，睇到host貼左張告示，話隔離屋係Crazy Guy, 叫我地10點後唔好大聲講野，同埋唔好響露台食煙。話隔離屋已經發癲多次，希望大家遵守。就咁睇張告示，可能令人覺得隔離屋難相處，或有一個負面形象，但我地睇到既，係隔離屋既苦處。老實講，如果成楝都係Bnb，其實問題不大。但如果在住宅，人地係正常人家日入而息，都唔希望隔離屋日日不同人，人來人往，晚晚夜夜笙歌吧！慘架真係，你知大家去旅行幾興奮架啦，經常吹水到半夜，仲要癲喪果隻，哈哈！
之前已睇到了FB 有篇文，寫住Bnb記得唔好半夜洗衫！呢個真係唔講唔知既，去旅行一定早出晚歸，返屋企沖涼攪埋 D 濕碎野1，2點走唔甩，半夜開機洗衫好正常。但因為日本D屋好薄，隔音好差，以為洗衣機唔貼對面牆無事，其實隔離屋同樓上樓下都會嘈到！我地中午開機洗衫，部機都好嘈，坦克車咁，半夜開真係會好騷擾！
另外，10點後唔好大聲講野了。我地香港慣左嘈雜，大家都慣左講野大大聲，唔係對方真係聽唔到。但日本人好斯文，講野好細聲，公眾地方好靜。我地去得人地地方，就要融入人地文化，注意聲量。
仲有另一樣野，就係Recycle，日本做得好足，所有垃圾桶都有分類。平時住Hotel我地掉垃圾無需留意，好少包開一袋。而住Bnb，就要同日本居民一樣，將垃圾分類拎落樓下掉。我地落樓下打開垃圾房，都見到佢地分得好清楚，一般垃圾，膠樽等一格格分類。
愈來愈多人book AirBnb，希望大家都注意到呢D事，多點顧及他人感受，可以開開心心享受每個旅行。
