advertisement
星期日老公放假，提議同2個仔去行下細細口中既金‘毛’公園(佢想講金門公園)。金門公園係三藩市一大地標，同金門橋一樣咁出名的，假日或好天既時候特別多人。住S.F.十幾年，都真係第一次日頭行呢個公園。
點解話日頭呢? 事關岩岩黎S.F.既時候，10幾歲，我地好鐘意幾個朋友深夜渣車入呢個公園探險！嘿嘿~ (做咩講講下講左鬼故架? 唔理喇講開又講埋啦haha)話說呢個公園都幾多鬼怪傳聞，例如話池塘果邊半夜有濕身女人行黎行去，因為當年佢同個仔比人追，唔小心跌落去浸瓜左；又話如果半夜衝左STOP sign，會有騎警發張已經唔會再用既舊告票比你；再來就係19街個紅綠燈位會有人亂過馬路但睇清楚根本無人... 咁呢個公園夜晚確實恐怖既！因為佢好多地方都無街燈，黑得可憐，好多樹林，仲要超勁大，又多掘頭路喎！兜兜下好似出唔返去咁。無錯，果時細個，鐘意找尋刺激，此處就岩晒我地成班V哇鬼叫喇！
好喇，講完D驚驚野，講返我地果日去金門公園行(係咪9唔搭8呢) 我地本身都好鐘意戶外活動，可能係咁，2個仔都好鐘意大自然。花草樹木，泥土小昆蟲，佢地都好有心機四圍睇同研究，又鐘意睇螞蟻軍隊，可以睇好耐。果日我地行左2個鐘，行入D樹林，上落斜又轉彎，亂行既感覺真好，有探險feel。
之後又見到大水牛，松鼠，綄熊，鴨群等動物，行程都幾豐富。2個仔算幾行得，係臨上返車先嗌累，老公話等佢地行多排慣左，可以帶佢地去hiking，仲多野睇喎!
