「你一定要請陪月，唔單止因為陪月可以幫輕你嘅工作，係因為奶奶唔會聽你講嘅嘢，陪月可以代勞……」

結咗婚兩三年，當然有諗過生小朋友，其實我都係嗰種唔特別鍾意人哋嘅小朋友嘅人，會唔會生小朋友，依家都十五十六。

前幾日同朋友食飯，真係好難先見到面，因為佢除咗返工嘅時間多數都係湊女。佢都同我講，有咗小朋友真係會冇晒自己時間，甚至會冇咗自己，叫我真係諗清諗楚，make sure自己100% ready先好生。

佢仲好開心講，話覺得自己生囡囡時有請陪月，係一個好明智嘅決定。皆因之前已經有friend提佢，一定要請陪月，等陪月教湊仔時，奶奶、媽咪都聽埋一份，因為有啲嘢好似「依家啲BB沖完涼唔再用爽身粉」、「唔使咁緊張成日同BB補奶粉」、「開冷氣好過開風扇」，呢啲說話，出自自已把口係唔會有人聽得入耳。

奶奶唔會聽你講嘅嘢，出自陪月口中就會容易接受好多。「如果你相信：坐月坐得好，以後冇煩惱，你更加要相信陪月姨姨嘅重要性。」

我幻想個情境，又諗起陪月姨姨最大貢獻原來唔只煮飯湊B幫輕下咁簡單，開始明白陪月點解會係一個高薪職業，仲依然大有市場。

點解台灣嘅媽咪一生咗小朋友個個要去月子中心？只要有一個方法可以將複雜嘅問題，例如奶奶、阿媽，以及所有複雜嘅問題拋諸腦後，呢個方法就會有一個好大嘅 market。如果香港開月子中心，都會大有市場。依家香港冇月子中心，陪月姨姨嘅地位就更加重要。