- motherhood
- by 呔媽Kelly
- 03/01/2018
星爺主演嘅經典電影《回魂夜》，相信唔少人都睇過。有場戲星爺提到，你怕鬼係因為由細到大身邊嘅人話比你聽鬼係恐怖，所以鬼唔埋嚟咬你你都會驚！
佢真係講得好啱，呢個情況其實同我哋教仔一樣，我哋灌輸畀佢哋對事物嘅第一個概念係好緊要，亦影響佢哋對唔同事物嘅反應。
「警察叔叔會拉你」講法害人
舉個例，大人們好鐘意用警察叔叔去嚇唔乖嘅小朋友，你再百厭，警察叔叔就拉你去坐監！攪到啲小朋友一見到警察叔叔就即刻唔敢郁，好驚做錯嘢畀人拉，個感覺好畏懼。但其實警察係一個被尊敬嘅職業，佢哋保護市民安全，父母應該教小朋友有事發生時要即時向警察求助，佢哋係嚟幫你的，見到警察應該感到安全同友善先啱。
試諗下如果小朋友一開始就好驚警察，佢哋遇事嘅時候未必會敢向警察救助，會錯失被救嘅機會。呢個就係關乎我哋灌輸小朋友嘅第一個概念。
鼓勵孩子不需要貶低別人
另一例子，我哋成日聽到街上嘅父母會貶低清道夫，倒垃圾，做清潔等工作，其實會扭曲小朋友對職業同金錢嘅價值觀。大人最鐘意同小朋友講，你唔努力讀書，第時就會做呢啲低級工作！正所謂職業無分貴賤，人格才分貴賤。搵幾少錢嘅工作，一分一亳都係別人付出勞力賺取的，都應該尊重。
而父母講呢種說話，會誤導小朋友睇低做呢啲工作嘅人，小朋友亦唔會感到別人辛勞為社會貢獻，只會用金錢去衡量事情。 當然，我明白作為父母，都想仔女將來成才，唔想佢哋做啲咁辛苦嘅工作。
我哋可以用另一個想法去教導佢哋，畀佢哋知道如果依家努力啲讀書，學多啲唔同知識，你長大後可以用呢啲知識去做一份自己喜歡嘅工作，可以有更多選擇。正面地鼓勵小朋友努力，無需貶低別人。
「唔好呢樣嗰樣」細膽其實源自父母
再講一個例子，朋友話佢嘅小朋友好麻煩，唔肯去沙灘玩，又唔鐘意落草地玩，因為對腳唔肯踩落地。但佢唔知道，其實係佢嘅言行令小朋友對事物卻步，因為小朋友都未試過赤腳去感受大地，我聽到嘅佢已經成日掛在口邊：沙沙污糟呀！草草拮拮呀！
所以即使小朋友未試過玩沙玩草，早已對呢啲嘢產生抗拒感。可能因為缺乏父母鼓勵，佢嘅小朋友對其他新事物都比較抗拒，成日驚驚青青，好多嘢都唔敢嘗試。
小朋友麻煩，好多時都係父母做成。佢哋對世界充滿好奇，樣樣嘢都想嘗試，但我哋聽得最多嘅係，唔好呢樣唔好果樣，佢哋都未有機會試過，已經畀人叫停。 在我而言，除咗危險嘅事物，其他嘢都應該盡量給予小朋友正面感覺。
鼓勵佢哋親身接觸唔同事物，從旁引導佢哋發掘事物嘅好處，因為佢哋對事物嘅第一個概念，係直接影響佢哋成長性格，以及長大後對生活的正確價值觀。
呔媽其他專欄好文：
呔仔上堂發夢老師叫佢戒食呢樣嘢 http://bit.ly/2vuXA0O
呔仔生日 Kelly媽記湊仔 9 年多感觸 http://bit.ly/2BAkXZG
