「尋狗啟示」啟發孩子同理心

近日有狗主響屋企附近每個街口，貼咗尋狗告示，而告示上面寫住：REWARD $1,000，即係搵得到呢隻狗就有1,000蚊美金打賞。兩個仔好好奇，因為未遇過呢種事情，原來有人唔見咗嘢，幫佢搵番係有咁多錢的。之後佢哋每日返學放學，都好努力留意有冇呢隻叫做Boots嘅小黑狗，因為見到佢，就等於可以賺到1,000蚊，可以買好多好多自己鍾意嘅嘢，或者儲起佢做有錢佬。見同佢哋傾開呢個題目，覺得有啲做人嘅道理可以教育一下兩個仔。

其實呢，呢個世界上係冇人想唔見嘢的，更加冇人想用錢買番本身屬於自己嘅嘢。如果呢個人肯出1,000蚊美金去搵番佢隻狗，隻狗對佢嚟講係好重要，好想失而復得搵番佢，所以希望用打賞去令鄰居門加倍幫忙留意。當然，你搵得番隻狗，佢會如承諾畀1,000蚊你，但可以諗下其實你係咪應該收呢？幫助別人係咪應該因為有回報先去做？

從小教兩個仔，凡事要調轉頭諗下，如果果個係你，你會點做，係咩感覺？呢句說話看似好容易，但其實可以真心為別人着想，顧人哋既感受，唔係人人做得到。但我教仔好鍾意用呢句說話引導佢地去思考，去諗下如果事情發生響自己身上，自己又會點樣呢？別人痛苦時自己唔覺，但當你諗到痛苦果個係你，你就會懂得顧及別人嘅感受，所謂:己所不欲，勿施於人。

我向兩個仔打咗個比喻，如果唔見咗心愛既玩具，可能係伴隨咗好多年一齊睡覺嘅公仔，已經當佢係好朋友，家庭既一份子。有日唔見左，你好緊張咁搵又搵唔到，每日都好擔心好唔開心，不如試下用打賞方法，等其他人幫手留意下，結果真係有人幫手搵到。可能打賞既錢係你辛辛苦苦儲咗好耐的，但因為太愛隻公仔，所以願意對換。

又試諗下如果對方比番隻公仔你時，佢唔收你嘅錢，只係同你講咗一句，希望你有能力時都幫助別人，給予別人快樂，比金錢更有意義！你係咪會好開心？好感激對方不求回報嘅幫助。辛苦儲嘅錢無畀左人，你深深感受到愛原來可以唔建基於金錢上。你將呢件事放響心，以後嘅日子會因為呢件事而不計較地幫助別人，人與人之間可以互相影響，係咪比你得到一筆錢更有意義？

錢，係會用咗去，亦會搵得番，而我哋講緊嘅愛，唔係人人都有咁嘅心去幫助別人，去愛人。我覺得即使兩個仔可能一知半解，但將來諗起媽咪呢段說話，可以一生受用，以愛影響別人。