不一樣的頒獎禮

遲仔由2013 年9 月至2014 年8 月，參加左一個為期一年嘅網球訓練班。收到主辦單位通知，遲仔可以出席一個頒獎禮，領取獎狀。

初時意為呢個頒獎禮，只係安排得獎者上台領證書，影下相咁樣。點不知到達頒獎禮現場，先知道呢個頒獎禮，原來係一個親子網球同樂日。喺頒發獎狀之前，大會安排左一系列嘅活動俾領獎嘅小朋友同埋家長一齊參與。

大會主持人係一位網球球練，佢不斷鼓勵家長一同參與，試玩不同嘅網球遊戲。原本只係諗住來幫遲仔喺領證書時影幾張相，無預計過要落場玩埋一份...。好啦，既然來到，點都試下啦。第一項係發球機。發球機開出一個一個慢速嘅發球，點不知，當我準備擊球時，個波唔知飛左去邊，結果試左幾次，一次都打唔到...。跟住仲有試下發球，同埋接應教練嘅發球...。雖然我之前都有學過下網球，但玩左幾輪網球遊戲後，覺得其實真係幾難。同埋，玩左一大輪，又洒又熱，對於少運動嘅我，都真係幾攰。

(同子女一齊用心學習，親身投入參與佢地嘅活動經驗，會令家長更明白子女。)

完成遊戲後，主持人語重深詳咁話，大會安排呢啲遊戲俾家長一齊玩，係好想「家長都親身感受一下打網球嘅經驗」。來到呢一刻，終於明白大會嘅用意！經過實際嘅參與，我明白到，對於只有六七歲嘅遲仔，要擊中個網球過網並唔係易事，要喺烈日當空下上兩個鐘頭一堂嘅網球課其實都幾辛苦，上完網球班攰到想喺梳化度攤下而唔想去沖涼係正常事...。原來能夠堅持完成一年嘅網球班，真係唔容易。

 (經過一年努力學習，遲仔都算打得有板有眼，叻仔。)

作為家長嘅我，好多時都會要求兩隻小鬼要做呢樣，做果樣。有時佢地未能我我嘅指示同要求去做時，我會好激氣。但係，若果能多啲去設身處地，易地而處咁去考慮佢地嘅想法，感受同難處，我諗我會明白佢地多啲，知道點樣幫助佢地。

真係估唔到陪遲仔出席頒獎禮，作為家長嘅我，都獲益良多，真係感謝大會用心良苦嘅安排啦。