不努力的女人??

前排Facebook好多人share一篇網文叫‘不努力的女人就是這樣的結果！

>> http://www.justfenxiang.net/?p=1000

睇完篇野真係想知個筆者其實係咪男人，仲要係自己本身鐘意滾既cheap佬！

內容妖言惑眾，對讀者婚姻毫無幫助，誤導大家既愛情同家庭觀。拍緊拖既睇完會對愛情對婚姻失去信心，結左婚既仲衰，分分鐘聽左佢講攪到家變！

筆者所講，男人女人婚前買樓。男的比15萬首期，女的比10萬裝修，既然係結婚用，又點會不是聯名樓呢?(最後就用呢點，講到女人離婚會一無所有@@)

之後攪笑喇，婚後喎，男人升職加薪，有左BB，經濟條件許可下，女人開始全職湊仔。個男人幾幸福先得架！你估個個女人都肯同你全職湊仔嗎? 至少我身邊朋友10個有9個啋你都傻啦！個個都話情願返工，都唔想全日對住個仔。但筆者竟然將女人既呢個咁偉大既付出(其實話係犧牲都不為過)，講成‘女人圍住老公，家庭，小孩轉，黃面婆一個’！哇！有無人性呀??

講下我自己，正正就係筆者筆下的「黃臉婆」，所以我知道黃臉婆唔易做。1日24小時，由起身到2個仔訓著既呢14小時，中間可能有幾個食野break，其餘時間係湊仔，打理家頭細務，買菜煮飯洗碗碟，洗衫褶衫，教仔睇功課。未計帶佢地去圖書館去playground放電既時間！我都好想知道，一個全職媽媽係如何可以唧到時間出黎做運動keep身形，可以去做Facial修甲扮靚。令自己不至於被班妹妹仔比下去。

當然，如果男人錫老婆，知道老婆辛苦，放假幫手湊仔做家務，等老婆可以抖抖去扮下靚似返個人，老婆亦唔會被逼變成「黃臉婆」吧！

我同意女人要keep，扮靚靚自己都身心舒暢。可以靚既我諗無人願意變醜卦? 但你又要明白陀仔果幾十磅,再加全身吹漲後再縮返果種鬆馳，唔係人人可以修身修到變返少女架喎！修到係好彩，修唔到都好正常吧。

而筆者講到好似女人一變黃臉婆，男人就大條道理去滾。女人keep唔到，肥左老左殘左係女人既錯，老公因此離婚係女人咎由自取咁！真係滿口歪理！！

咁我想問一句，究竟婚姻係建基於咩??

想身邊人10年如一日青春貌美，可以不停換畫愈換愈後生，何需結婚呢?

如果不努力的女人就是這樣的結果，咁‘不珍惜的男人’又會係咩結果呢??

「