人善被人愛

上回講左呔仔細細既性格﹐今次就講下我作為媽咪﹐對於呔仔呢類性格淋善既小朋友既睇法同教法。

話說好多卜友睇到呔仔性格﹐就話自己同呔仔好似﹐好似揾到知音人咁~ 點解會係“揾到知音人”呢? 因為大家都好似覺得呢類型人係唔夠大眾化﹐唔容易響呢個社會生存咁﹐哈~ 大家都係性格特淋善﹐無咩鬥心﹐咩都比人先﹐唔想惹麻煩。唔鐘意同人爭野﹐唔愛表現自己出風頭(亦唔愛比阿爸阿媽推佢出去表現於人前攞彩)。呢類性格既人﹐其實有好多優點﹐而缺點就係比較缺乏自信。

同“呔型”人相處﹐其實係好舒服﹐感覺好自在~ 但可能好多家長都唔識欣賞呢類性格既小朋友﹐因為覺得唔識同人爭野好蝕底。特別是響香港一個咩都爭餐飽既環境下﹐好多父母既價值觀扭曲﹐將自己果套“唔執輸”理念灌輸比小朋友﹐夾硬將一個天真無邪既小朋友訓練到成隻monster咁﹐就係為左出到去唔會蝕底﹐識得同人爭野?﹗

聽過幾個朋友都咁講﹐自己小朋友太淋﹐成日比同學仔蝦﹐有時個心都想教佢對蝦人既小朋友要惡D﹐唔好成日比D古惑同學呃左D野去﹗但咁樣教佢地又好似唔係咁應該﹐整整下咪變左同佢地一樣?

我覺得可以教佢地避開呢D人﹐保護自己。但又唔使教佢地諗人地點衰﹐咁樣會破壞左佢既善良﹐令佢覺得好多衰人成日蝦佢﹐咁佢個世界就唔靚架喇~ 話你知佢地呢類淋善人﹐通常比人水左都唔知架﹗因為佢地無呢個唔好既心﹐所以唔會諗到人地唔好既一面。呢個亦係我愛錫呔仔既原因﹐佢真係好單純﹐唔會諗人地係呃緊佢^^

記得上年呔仔剛入學﹐不久聖誕表演上台唱歌。全校得佢一個喊足全程咁滯﹐仲要企正響台中間擘大喉嚨喊。全場好歡樂呀﹐因為佢堅係喊得好攪笑﹐直情同在場既歡樂氣氛相映成趣~ 唉呀可憐我個仔﹐當時內心一定好驚好無助喇@@最後經過我一輪安慰﹐佢同我講“我唔會唱歌比人聽架﹗我淨係會唱比你聽架咋﹗”終於我坐左響台下面﹐佢望住我完成左最後一首歌(喊左頭兩首)﹐仲跳埋舞添﹗哇﹗果刻我覺得佢係全世界最叻既人呀﹗﹗

之後老公問我有無唔開心? 佢問得我﹐佢一定有D覺得呔仔咁既表現係唔達標﹐覺得點解個個都做到既事﹐係自己個仔做唔到。呢樣野我就唔係咁睇法~ 佢性格係咁樣﹐唔鐘意表演於人前﹐仲要咁多人望住晒喎﹗驚係好自然既反應~ 唔可以覺得佢有問題﹐佢只係唔鐘意做其他人都鐘意做既野(呢樣野其實好似我﹐所以我好明白佢﹐哈~) 即係“做咩我要唱歌跳舞黎氹你地開心先? 我唔鐘意做焦點嘛﹗我驚我咪喊囉﹗”

拿﹗呢D咪小朋友囉﹐幾可愛呀﹗佢只係隨心而行﹐唔需要理人點睇佢﹐佢就係佢﹗我反而覺得想好好珍惜﹐記低佢咁純真(又或者叫做“仲可以咁純真”)既一刻。因為佢慢慢長大﹐背負住大人對佢既期望﹐就開始要面對好多事﹐做好多未必係自己想做但又一定要做既野。所以我成日都提醒自己﹐基本野佢做得到已經足夠﹐其他興趣上既野盡量比佢自己決定。只要佢健康快樂成長﹐呢個就係我最大成就喇^^