仔仔問乜嘢係「後母」，我會咁答…

有日放學，大仔問我：「媽咪呀，咩嘢係Stepmom呀，係點樣架？」我好奇點解佢會講起呢樣嘢，原來佢有個同班同學，爸爸媽媽離咗婚，個同學依家同爸爸及後母一齊住，小息時大家講起，所以佢放學就問我。由於我兩個小朋友都係仔，佢哋細個無聽過灰姑娘嘅故事，唔知咩係後母。童話故事一般都將後母塑造成變態惡毒嘅女人，一定會對繼子女施毒手的，所以一般細路都好驚後父後母呢樣嘢。

好似我咁，爸爸響我好細個時離開咗，之後媽咪結識咗男性朋友，我都必定親自搞破壞，當時係好怕有叔叔搶走媽咪，覺得叔叔唔係好人，更害怕會有後父呢個人出現。當然，大個先知道，咁樣係破壞咗媽咪得到幸福嘅機會，但小朋友想法就係咁簡單了。

人大咗，發現其實後父後母都唔係咩一回事，最重要都係父母兩個人相處得好，大家有個伴分享傾訴，當然最好就係對另一半嘅仔女都好，當親生一樣愛護。新聞時有報導，就算親生父母都可以唔錫自己仔女，甚至虐待，所以唔可以話親生一定好，後父後母一定衰，每個家庭既命運都唔同吧。

做仔女幸唔幸福其實都係睇彩數，睇吓父母係個點樣嘅人，呢啲真係唔到自己控制。當睇到呢啲虐兒新聞，可以把握機會教導小朋友，幸福唔係必然，父母唔一定愛錫仔女。當自己有個好爸爸好媽媽，全心照顧同愛錫自己，就要更加珍惜，更加愛護屋企，唔好做壞事令父母失望。

同時我亦教導佢哋，美國係一個自由開放既國家，其實好多人嘅家庭背景都好複雜，兄弟姊妹可以全無血緣，父母結婚離婚好多次唔係奇事。我哋生長於中國人家庭，對呢啲事可能接受能力較低，但都要教懂兩個仔尊重他人嘅意願。好似大仔嘅同學有後母，我教佢知道呢啲事嘅時候唔好覺得怪異，每個人都有權選擇自己開心生活嘅方式，即使他人同自己選擇嘅唔一樣，又或者唔係自己受接得到嘅事，都要尊重別人，唔可以講一啲傷害別人嘅說話。

我認為從小學懂尊重不同文化，對長大後處理人際關係很有幫助，父母亦可以從不同事件中教導仔女建立正確人生觀。