兒童抽動症

上篇講完「愛麗斯仙境症」，今次又講下呔仔另外一個同期發生嘅毛病 - 抽動症 (Tic Disorder)。係呀，又係佢囉！OK 啦慣左無事架喇，關關難過關關過，不過呢關未過架，佢而家仲係抽緊，不過係小抽唔係勁抽。我諗呢個同呔仔性格有關，佢比較容易擔心同緊張，易有壓力，個人唔係咁易放鬆。另一方面可以話佢好有交帶，好細心，好關心每件小事。呢個事緣係佢上年9月升小學，話就話唔緊張，但情緒點都有 D 變化嘅，因佢本身唔係咁易接受新環境。咁差不多開學前1星期，佢黎料喇，見佢開始頻密地重複擘大口呢個動作，有時嚴重到講一句說話要停幾次擘一擘口。佢自己又唔知喎，因為同佢講完佢下一秒就做架喇，證明唔係壞習慣，上網睇過問過卜友 (我班卜友好猛料，有問必答架 haha)，係抽動症嘅一種，應該係情緒影響，緊張時動作更頻密。

而抽動症嘅動作，唔止口擘擘，其他如聳膊頭、戚眉眨眼、撥手、喉嚨發出低哼聲等，總之一組肌肉無意識地重複做同一個動作，就係抽動症病徵囉。研究指多發生於2-15歲男仔 (女仔比例少)，一般一段時間會自癒，又有可能持續到成人，睇彩數啦下。由於呔仔擘口擘得好大，外人見到會奇怪嘛，咁我有 email 老師同佢講咁嘅情況，同埋叫佢當透明，只需觀察下佢有無減輕左或嚴重左通知我就 OK。因為呢 D 比呔仔知佢又控制唔到，如果佢知道後好介意人地望佢，只會令佢更緊張，病情惡化。慢慢過左3幾個月，佢又減少左喎，定可能我都無咁專登去緊張，覺得佢間中先會擘一擘口。而前排佢又試過狂眨眼啦，重複清喉嚨咁嘅聲啦。研究話會架，一個動作消失，又可能會出現另一個動作。總之唔影響佢正常生活學習嘅，都無需要食藥控制，由佢慢慢消失。好彩就係升小學，D 同學仲細，同埋踏入非常古靈精怪嘅年紀，個個都鍾意擠眉弄眼，無人會理呔仔嘅動作，暫對佢都無咩影響嘅，希望佢快 D 好番啦，不經不覺都成9個月了！

而經歷左咁多奇怪野後，我得出一個結論係，無論個小朋友講野有問題，行為怪異 (當然係講緊病徵，唔係佢百厭)，我地都係當透明就得架喇，只需暗中觀察，不需大驚小怪。響度祝大小朋友都身體健康，開心每一天！