呔媽專欄｜公平考試真的公平?

早前睇到一張圖畫，畫中有一群動物，有馬騮，企鵝，象，魚，海獅同狗，然後考官出左一個考題要「公平地」考驗呢群動物，題目係: 鬥快爬樹！

呢張圖確實好值得我地反思，究竟用同一個考試題目，去評核佢地既才能，真係公平嗎?

情況就等於依家既教育制度，大中小學，每個學生都進行同一個考試，用同一份試卷去評核所有人既能力。考得叻既可以晉級，得到讚賞；而考得差既可能會留級，被人覺得唔努力，無用！對我而言，呢種聲稱公平既考試，根本係世界上最唔公平既東西！

不是嗎? 雖然我地都係人類，但每個人既資質同潛能，與生俱來就完全唔同，就如圖中不同動物，夾硬將佢地擺響同一個秤去量度，結果馬騮輕易成為爬樹冠軍。而其他動物就等於無用了嗎? 錯喇，如果測試變成游水呢? 變成賽跑呢? 變成滑冰呢? 今次可能到馬騮要包尾了。

我地作為父母，好多時會不自覺地跳左入一個教育基制框框，會以學分黎評估自己既小朋友。就好似學校係唯一世界咁，為左自己小朋友能夠成為「別人眼中既叻仔」而不斷催谷，無真正了解自己小朋友既潛能，幫助佢地發揮專長。好似我兩個仔細個，佢地書本學習方面唔係好標青，但佢地對科學發明方面好有興趣，又鍾意自己研究唔同事物。我覺得咁樣好好呀，唔需要各科成績標丙，只要佢地對自己有興趣既事衝住去學，已經係我心目中最好既教育了。

希望大家都記住，每個人既學習傾向同潛能都唔同，同一把尺，根本只可度量一個人，而呢把尺，唔應該係學校老師比我地。我地自己做父母的，自有一把用黎量度自己小朋友既專用尺！自己細路自己度，唔需要因為別人一句不公平評語，就睇小自己既細路，覺得被比下去。公平來講，只有我地先最了解自己小朋友既潛能，只要擺岩位置，鼓勵佢地發揮所長，魚就去游水，企鵝就去滑冰，其實每個小朋友都可以係冠軍！！