原來湊得很快樂

我係個凡事都係以「快樂」為目的嘅人。拍拖，工作，生活...如果唔開心嘅，點解要去做? 做完唔開心嘅，又有咩意思呢? 人生嘛，原本意義就係要追尋快樂！當然，每個人對快樂嘅定義都唔同，有人會擺自己行先，有人會擺仔女行先。而我係後者，所以響「湊仔」呢件事當中，我得到快樂同滿足！

響呢5年湊仔既過程入面，我想同大家分享一D我睇到既野，而呢樣野，係絕對影響住一個人湊仔湊得開唔開心。

呢樣野，就係一個‘做媽媽既心態！

響未有小朋友之前，都有聽過人地問，有心理準備做媽媽喇?

下? 有咩要準備呀? 生左咪湊囉，煮到埋黎就食架啦！但原來，呢句野係有料到，原來所講嘅心理準備，係一個做媽媽嘅心理準備。如果要用犧牲黎形容，我又覺得眨義左，但呢個確實係一種犧牲，只係當你改變左自己心態嘅時候，你又會好願意去付出，會覺得呢種付出係好幸福好快樂架喎！

呔仔細細返學，我比佢地返上午。每次同D同學媽媽傾計，總會聽到對方話:點解唔比佢地返全日呀? 佢地返全日你咪唔使響屋企睇住佢，輕鬆好多喎！

丫，我又唔係好明，點解生左個仔出黎，做父母既會有‘可以唔湊就唔湊，最好唔使成日對住佢’嘅諗法呢? 小朋友，過多幾年你想日日對住佢，佢睬你都傻啦！到時佢有自己生活圈子，有同學仔，有佢地自己嘅娛樂。而家呔仔細細嘅世界，佔最多既相信係我同爸爸。既然可以爭取時間陪佢地玩，畫畫填顏色，教佢地做人既道理，我點解要全日掟左佢地返學校，放學返黎食個飯又話訓覺喇。要返工就無辦法啦，既然有時間嘅，做咩唔自己湊佢地呢。

幾年間，都遇過唔少怨天怨地既媽媽，莫講話要全職湊日日對住個仔，就連放假要對佢一日半日都牙痛咁聲。我就明白左一個道理，係你既心態問題，心態決定你快唔快樂！如果你一直用未有小朋友既心態去過你而家既生活，你會覺得同坐監無分喇。無晒自由，湊住個仔咩都做唔到。同時亦同另一半計較，做咩你唔湊要我湊，做咩你可以約friend我就要留響屋企湊仔?

但其實只要你改變自己既心態，認同小朋友既童年就係在於爸爸媽媽既付出，你付出愈多，佢既童年就愈開心愈豐富。而一個人既童年，係直接影響佢成長既心理質素。問題就係在於你點去睇每一件事，無錯你打唔到牌，但你可以同個仔去公園玩，同佢追黎追去，睇下D花花草草，佢拖住你好開心喎！當你做任何野都以小朋友行先時，你見到佢開心，你會發現，原來湊仔係好快樂既！