呔仔告發同學帶玩具返學，呔媽話佢知咁做有咩唔好，仲要佢做一件事補救……

返學就係小朋友成長嘅重要一步，而比起幼稚園，小學可以話係一個更廣闊嘅小社會，小朋友踏進小學後，真係會有好多同好大嘅轉變，係未返學不能預計的。

雖然學校教育的思想行為大多正確，但我哋做父母都需要從旁指導及協助，小朋友先可以更正面地成長，因為返學唔止學習知識，更重要嘅係品德教育，以及在呢個小社會上的人際關係。

大仔從前是少出聲，怕事型。記得佢入幼稚園時，老師話佢少出聲，仲唔鍾意同學行近，同學貼埋嚟佢仲會避開添，少參與群體遊戲，鍾意自己一個人玩。當時老師有提及驚佢社交方面有問題，叫我多點鼓勵佢，不過我冇。

因為我覺得呢個係佢性格，覺得唔舒服可以唔同人玩，反正我好怕勁熱情嘅小朋友，同埋我覺得唔需要因為別人而刻意改變自己，除非有阻礙性。我一直由佢自然發展，做自己最開心。

大仔升小學變外向
上小學後，大仔頭兩年開始適應群體生活外，仲健談咗好多，呢個係我始料不及的。佢開始有好多朋友，好鍾意返學，放學會同我講今日開唔開心，發生過咩事之類，似乎有個好的社交圈，令上課更投入更愉快。

有一日，大仔放學返嚟同我講，A 同學嬲咗佢，冇再同佢玩。傾談之下，原來早前大仔話咗畀老師知 A 同學帶 Spinner 返學校玩，老師因此沒收了，放學 A 同學家長取回。我大驚，哇！乜你做埋啲咁嘢呀？！竟然篤灰（註）！唔怪得之人哋嬲你啦！

我問佢，點解要咁做呢？佢話，學校講明係唔可以帶 Spinner 返學架！我解釋，但個問題係，應該由老師自己發現去罰佢，而唔係由你去話畀老師知，你咁做，同學就會唔鍾意你，因為你累佢畀老師罰，但其實你根本唔需要干涉他人嘅事，除非影響到你。

調轉頭諗，如果係你帶玩具返學，有同學話畀老師知，而令你受罰，你都會嬲果個同學，係咪？大仔點頭。跟住話其實係因為佢唔太鍾意呢個同學，所以先咁做，係想令佢唔好再咁牙擦擦！依？原來有內情，我又有興趣聽下喎！估唔到個仔人仔細細，開始有呢啲社交現象。

唔抵得同學牙擦認叻
原來佢話 A 同學平時成日認叻，話佢爸響機場做嘢，每日搵幾多幾多錢，之後又話自己有齊最大最勁嘅 Nerf Gun(玩具槍)之類，大仔就唔鍾意佢咁樣。我聽到覺得好得意，同埋真係一個小社會嘅預演，因為響我哋嘅生活入面，都有機會遇到一啲好鍾意認叻嘅人。

我教仔，第一，你真係叻嘅話，唔需要同人講，人哋都會從你嘅成績，行為舉止，談吐中發現你係一個叻同有智慧嘅人。第二，一個人叻唔叻，同金錢物質不掛勾！佢爸爸搵幾多錢，與我哋無關，正所謂發達唔會益你，窮又唔會問你借，咁理嚟做咩？

可能佢爸爸用晒啲時間心機去搵錢，但你嘅爸爸搵到足夠錢支撐屋企之餘，亦花好多時間心機去陪你，咁你覺得邊個爸爸叻啲？

你又諗喎，你可能冇佢咁多Nerf Gun，但你玩得好開心，射得中你瞄準嘅對手，已經係叻啦，係咪？所以呢，凡事我哋係睇自己有啲咩，滿足於自己有嘅嘢，其他人有更好更多嘅咪替佢哋開心囉！每個人有嘅嘢多少都唔同，唔需要同人比較，因為多又未必開心，少又未必唔好。

最後，我叫大仔要為呢年事同 A 同學道歉，無論佢點認叻都好，係佢個人性格問題，冇對你做過唔好嘅事，但你篤灰就非常不對，必須道歉。大仔第二日寫張紙仔道歉，A 同學話原諒了，大仔釋懷，大家又 Happy Together 啦！

（註）以前走私白粉稱為「跳灰」，而「篤灰」就是告發別人走私白粉，意指指證別人做出作奸犯科的事。